Arsimtarja e pensionuar e fizikës dhe kimisë Sharlotte Hydorn nga Kalifornia për 20 vite ka shitur nga shtëpia e saj pajisje për vetëvrasje, ndërsa do të dënohet vetëm për shkelje të ligjit të taksave.

Ajo ka pranuar se nuk ka paguar tatim për shitjen e ‘produkteve’ të saj nga viti 2007 deri në vitin 2010. Gjatë kësaj periudhe, sipas hetuesve, së paku shtatë persona kanë përdorur ato pajisje për të bërë vetëvrasje.

Prokurori ka thënë se Hydorn ka shitur rreth 1.300 komplete për mbytje me gaz të punuara nga vet ajo. Një komplet ka kushtuar 60 dollarë, ndërsa së bashku me të shkonte edhe udhëzuesi i përdorimit.

Kjo gjë u zbulua pasi familja e një ‘klienti’ nga Oregoni kishte kuptuar se ai e ka përdorur pajisjen e saj për të kryer vetëvrasje në fund të vitit 2010.

Sipas Reuters, gjykata nuk do ta ngarkojë 92-vjeçaren me vetëvrasjet, por do ta dënojë për thyerje të ligjit të taksave.