Thaçi: Kosova përkrah politikën amerikane kundër terrorizmit
Në kuadër të 12 vjetorit të sulmit terrorist në SHBA, kryeministri i Kosovës Hashim Thaçi ka thënë se ky sulm ka treguar më së miri natyrën barbare të ekstremizmit fundamentalist.

Ai theksoi se institucionet e Kosovë përkrahin politikat amerikane të luftës kundër terrorizmit.

"Dymbëdhjetë vjet më parë Shtetet e Bashkuara të Amerikës u goditën nga sulmi terrorist që tronditi tërë botën demokratike.

Sulmi mbi kullat binjake dhe në caqe të tjera, kushtoi me humbjen e jetëve të mijëra njerëzve, qytetarë amerikanë dhe punonjës nga të gjitha vendet e botës.

Ky sulm më së miri tregoi natyrën barbare të ekstremizmit fundamentalist, duke goditur në zemrën e demokracisë botërore, me qëllim të frikësimit, kërcënimit dhe mbjelljes së pasigurisë.

Shtetet e Bashkuara të Amerikës dhe mbarë bota demokratike e përjetuan rëndë 11 shtatorin e vitit 2001, duke shpalosur vlera solidariteti dhe përkrahjeje të jashtëzakonshme për shtetin kampion të lirisë dhe demokracisë botërore.

Edhe në këtë tragjedi Shtetet e Bashkuara të Amerikës treguan vlerat e larta si fuqi morale e materiale, përballë një të keqeje perfide dhe antinjerëzore.

Me fatin e viktimave, me popullin dhe administratën amerikane u solidarizuan edhe qytetarët e Kosovës, të cilët i janë mirënjohës përjetë SHBA-vë për kontributin e pakursyer për lirinë dhe pavarësinë e vendit tonë.

Institucionet e Republikës së Kosovës vazhdojnë të jenë përkrahës dhe mbështetës të politikës amerikane në luftë kundër terrorizmit, kundër shteteve diktatatoriale dhe formave tjera shtypëse të regjimeve dhe grupeve kriminale.

Shtetet e Bashkuara të Amerikës, falë potencialeve të pakufishme njerëzore dhe materiale vazhdojnë të jenë faktori numër një i garantimit të lirisë së lëvizjes, sigurisë dhe qarkullimit të vlerave materiale dhe kulturore në botë.

Qytetarët e Kosovës dhe institucionet shprehin ndjenjat e solidaritetit me familjet e viktimave të 11 shtatori 2001" - ka thënë Thaçi. /albeu.com/
Shtuar më 11/09/2013, ora 18:30
Shkruani komentin tuaj!
Të fundit nga kjo kategori