Shpërndanin kokainë e kanabis, arrestohet çifti i bashkëshortë në Fier
Dy persona janë vënë në pranga nga policia, pasi akuzohen për shpërndarje të lëndëve narkotike. Policia bën me dije se janë arrestuar shtetasit Edmond Bishani, 56 vjeç dhe Rovena Bishani, 44 vjeçe, banues në Fier (bashkëshortë).

“Në vijim të punës për goditjen e veprimtarisë kriminale të shpërndarjes së drogave të forta në doza të vogla dhe parandalimin e veprimtarisë kriminale në fushën e falsifikimit të monedhave, specialistët për Hetimin e Narkotikëve dhe Trafiqeve në bashkëpunim me Seksionin për Hetimin e Krimit Ekonomik e Financiar në DVP Fier, zhvilluan dhe finalizuan me sukses operacionin policor të koduar “SHTEGËTARI”, në kuadër të të cilit u kapën dhe ndaluan shtetasit: E. B., 56 vjeç dhe R. B., 44 vjeçe, banues në Fier (bashkëshortë)”, njofton policia.

Autoritetet bëjnë me dije se gjatë hetimit disa mujor nën drejtimin e Prokurorisë së Rrethit Gjyqësor Lushnjë, rezultoi se këta shtetas merreshin me veprimtari kriminale të shpërndarjes së lëndëve narkotike dhe të falsifikimit të monedhave. Po ashtu, uniformat blu njoftojnë se gjatë kontrollit të ushtruar në banesën e tyre të marrë me qera në Fier, gjetën dhe sekuestruan në cilësinë e provës materiale 28 doza me lëndë narkotike kokainë dhe 24 doza me lëndë narkotike cannanis sativa.

Gjithashtu për këta shtetas, Prokuroria pranë Gjykatës së Shkallës së Parë Lushnjë ka nxjerrë urdhër ndalimi për veprën penale “Falsifikimi i monedhave” pasi këta shtetas, në qytetin e Lushnjës dhe Divjakës, në kohë të ndryshme kanë blerë artikuj me kartëmonedha të dyshuara të falsifikuara, ku janë dokumentuar 3 raste në muajt Korrik dhe Dhjetor 2020.

Materialet hetimore i kaluan Prokurorisë, për veprat penale “Prodhimi dhe shitja e narkotikëve ” dhe “Falsifikimi i monedhave”.
Shtuar më 14/01/2021, ora 13:14

Shkruani komentin tuaj!
Të fundit nga kjo kategori