Menjëherë pas vendimit të presidentit Nishani për faljen e Nazime Vishës, një reagim i ashpër ka ardhur nga familja e Fiqiri Muçës. Gruaja e viktimës, Mynyre Muça, gjatë një prononcimi për “Panorama Online”, e ka cilësuar një vendim jo të drejtë.

"Presidenti s’kishte arsye pse të falte Nazimen. Nuk jemi thirrur në asnjë seancë. Ky është një shtet kriminel, hajdutësh dhe jo një shtet ku mund të gjesh e të marrësh drejtësi”, ka thënë më tej ajo.

Gruaja, nënë e katër fëmijëve, më i madhi prej të cilëve 19 vjeç, thotë se pasi i vranë burrin, familja e saj u shkatërrua. “Ajo nuk mund të falej, ajo nuk vrau vetëm Fiqiriun, ajo vrau gjithë familjen tonë”, thotë ajo duke shtuar se “ai ishte shtylla që mbante shtëpinë dhe i siguronte edhe paratë”. /albeu.com/