Moska kërcënon me hakmarrje të ashpër pas sulmeve të Ukrainës ndaj anijeve ruse në Detin e Zi

Moska dhe Kievi janë në një trajektore të përshkallëzimit të marrëdhënieve.

Rusia ka kërcënuar se do të ndëshkojë Ukrainën për sulmin e një cisterne komerciale pranë ngushticës Kerç, duke e quajtur sulmin një “akt terrorist”.

Të dyja palët thanë më herët se një anije ukrainase pa pilot, e ngarkuar me eksplozivë, përplasi një cisternë ruse gjatë natës pranë urës që lidh Rusinë me gadishullin e aneksuar të Krimesë. Ky ishte sulmi i dytë i tillë në 24 orë.

Zëdhënësja e Ministrisë së Jashtme ruse Maria Zakharova tha se Moska do të hakmerret.

“Regjimi i Kievit, pa u dënuar nga vendet perëndimore dhe organizatat ndërkombëtare, po zbaton në mënyrë aktive metoda të reja terroriste, këtë herë në ujërat e Detit të Zi. Nuk mund të ketë asnjë justifikim për veprime të tilla barbare që nuk do të mbeten pa përgjigje dhe autorët e tyre në mënyrë të pashmangshme do të ndëshkohen”, tha ajo në një deklaratë të lëshuar.

Më herët, ish-presidenti rus Dmitry Medvedev la të kuptohet se Moska do të nisë më shumë sulme në portet ukrainase në përgjigje të sulmeve të Kievit ndaj anijeve ruse në Detin e Zi. ndërsa ai kërcënoi Ukrainën me “katastrofë ekologjike”.

“Vagabondët dhe përbindëshat kuptojnë vetëm brutalitetin dhe dhunën. Me sa duket, sulmet në Odesa, Izmail dhe vende të tjera nuk u mjaftuan”, ka shkruar në një postim Medvedev, i cili është nënkryetar i Këshillit të Sigurimit rus (i kryesuar nga Vladimir Putin).

“Nëse traversat e Kievit duan të shkaktojnë një katastrofë ekologjike në Detin e Zi, ata duhet të kenë një të tillë në tokat e tyre që së shpejti do të kalojë në Poloni,” shtoi ai.

Nuk është e qartë se çfarë lloj fatkeqësie ekologjike i referohej Medvedev.

Zyrtarët e lartë rusë kanë pohuar, pa dhënë prova, se “në një moment” trupat polake do të vendosen në Ukrainën perëndimore, ndërsa Rusia ruan dhe zgjeron territoret që ka aneksuar në mënyrë të njëanshme në Ukrainën jugore dhe lindore.

Më herët, kreu i Shërbimit Sekret të Ukrainës (SBU) pranoi se sulmet e njëpasnjëshme nga dronët detarë kundër anijeve ruse ishin orkestruar nga Kievi.

Në veçanti, Vasyl Maliuk theksoi në një postim të lidhur në Telegram se “operacionet speciale të kryera në ujërat territoriale të Ukrainës janë absolutisht të ligjshme”.

“Çdo operacion me anijet e Federatës Ruse ose në urën e Krimesë është një hap plotësisht logjik dhe efektiv në lidhje me armikun,” tha Maliuk, duke shtuar se këto sulme kryhen në ujërat territoriale të Ukrainës dhe për këtë arsye “ato janë plotësisht ligjore”.

Sipas tij, nëse rusët duan të ndalojnë këto veprime, ata duhet të përdorin opsionin e vetëm, të largohen nga ujërat territoriale të Ukrainës dhe toka e saj.

“Dhe sa më shpejt ta bëjnë këtë, aq më mirë do të jetë për ta. Sepse ne do ta mposhtim armikun 100% në këtë luftë” , shtoi Maliuk./Albeu.com/


Shtuar 5.08.2023 20:11