Disa ditë më parë Policia e Shtetit është mobilizuar për të shpëtuar kafshët e një kopshti zoologjik privat në Fier, pasi luani me sy të nxirë bëri xhiron e botës me fotot e shkrepura nga reporterët e “Daily Mail”, të cilët e quajtën “Kopshti zoologjik i Ferrit”.

Por kafshët deri më sot nuk janë lëvizur nga kopshti i "ferrit" dhe vetëm ditën e sotme ka nisur zhvendosja e 13 kafshëve të “Safari Park” në Fier.

Anduel Xhalia, Drejtori i Drejtorisë së Mjedisit u shpreh se sot do të bëhet mbyllja e parkut, pasi ka kaluar çdo afat për dorëzimin e dokumentacionit.

Xhalia tha se kafshët do të zhvendosen të gjitha sot. Ai shtoi se kërkohet ndërhyrje e menjëhershme, pasi nuk dihet në ç’gjendje janë kafshët.

Nga ana tjetër pronari i këtij kopshti, Elvis Sulejmani, thotë se nuk ka asnjë vendim gjykatë për marrjen e kafshëve.

Sulejmani ka pohuar se janë plotësuar të gjitha kushtet dhe dokumentacionet për vazhdimin e aktivitetit dhe kafshët nuk mund të merren forcërisht.

Ndërkohë po ju sjellim disa pamje të siguruara nga televizioni Fax. /albeu.com/