Jo vetëm Berisha, politikanë të tjerë në listën e zezë amerikane?
SHBA-të pritet të jenë jenë më të drejtpërdrejtë sa i përket raporteve me politikanët që po dalin kundër ReformësDrejtësi.

Pak ditë më parë Rama tha në Kuvend se Berishës i është ndaluar hyrja në SHBA, gjë e cila është mohuar nga ky i fundit.

Megjithatë sipas Fatos Klosit dhe Spartak Ngjelës ka edhe të tjerë që do të futen në listën e zezë të SHBA-ve.

Gjatë një prononcimi për gazetën “Sot”, Ngjela deklaroi se amerikanët i kanë gati letrat për përfaqësuesit e politikës tonë dhe nëse këta të fundit bëhen pengesë për zbatimin e reformës, SHBA do të hedhë hapin e fundit.

“Unë kam një bindje të brendshme nëse këta do të vazhdojnë të dalin hapur kundër reformësdrejtësi do t’i nxjerrin non grata në Amerikë të gjithë.

Rama siç duket këtë kishte që ka folur. Mbase e kanë kërcënuar edhe Ramën dhe kushedi se çfarë i kanë thënë.

Unë e di që në rast se ata do të bien ndesh me reformën në drejtësi, për këtë jam i sigurt, politika amerikane do të hapë letrat sepse nuk ka rrugë tjetër.

Kur e morën Saliun dhe e futën në çadër që erdhi Brian Yee këtu, mendon se nuk i nxorën letrat? Patjetër që i nxorën letrat.

Këta çfarë presin? Mos duan që t’ua nxjerrin në publik letrat që tu thonë po pengoni reformën në drejtësi?

Kështu që po frenuan reformën, të gjithë non grata do të shpallen dhe amerikanët do të nxjerrin letrat. Nuk je i dëshirueshëm për ta nëse pengon reformën”, tha Spartak Ngjela.

Për listë të amerikanëve me emra të politikanëve shqiptarë foli dje edhe ish-kryetari i Shërbimit Informativ Shtetëror, Fatos Klosi.

Në një reagim për gazetën, Klosi u shpreh me siguri që SHBA disa anëtarë të politikës tonë nuk i shohin me sy të mirë, ndërsa paralajmëroi edhe se shumë prej tyre meritojnë të shpallen non grata.

“Unë do të thosha që Shtetet e Bashkuara të Amerikës patjetër që kanë një listë të politikanëve shqiptarë që nuk i shohin me sy fort të mirë.

Një gjë e tillë ka qenë, ekzistonte që në kohën kur unë isha në SHIK. Por natyrisht diplomacia nuk jua lejon që këto gjëra të thuhen hapur, po nuk u mbush kupa tamam. Por që ata kanë opinione të ndryshme për politikanët shqiptarë, kjo është e padiskutueshme.

Pastaj a i përdorin këto opinione siç i kanë përdorur, siç mund të jetë një rast që ndalojnë dhënien e vizës, i cili është një mesazh që sigurisht domethënës. Ka edhe shumë politikanë shqiptarë që meritojnë të shpallen non grata nga SHBA.

Kam frikë se janë shumica e tyre”, deklaroi Klosi.

Ai shtoi se një faktor kryesor që ndikon në vendimin e SHBA për të shpallur non grata politikanët shqiptarë janë sulmet e tyre ndaj reformësdrejtësi. Sipas tij, amerikanët nuk iu lënë dot hapësira armiqve të reformës dhe i ndëshkon ata.

“Një nga arsyet që mund të detyrojnë amerikanët të të shpallin non grata mund të jenë edhe akuzat kundër reformësdrejtësi.

Këtë e kam bindje për sa kohë që reforma në drejtësi është kryesisht vepër e Shteteve të Bashkuara të Amerikës, është shumë e qartë që ata nuk mund të jenë painteresuara për ata që e pengojnë këtë reformë.

Dhe një nga mjetet që kanë dhe që e përdorin për ta shprehur këtë dhe për të korrigjuar qëndrimet të politikanëve shqiptarë është shpallja non grata e tyre”, tha Fatos Klosi.
Shtuar më 02/02/2019, ora 10:26
Shkruani komentin tuaj!
Të fundit nga kjo kategori