Qëlloi me armë zjarri dhe kërcënoi qytetarët, arrestohet “i forti” i Këlcyrës (VIDEO)

Policia ka arrestuar Seit Alikollarin në Këlcyrë, pasi ditën e djeshme ka qëllur me armë zjarri duke terorizuar banorët.

Ky shtetas,  ka dalë në qendër të qytetit të Këlcyrës duke gjuajtur me armë në ajër e duke kërcënuar kalimtarët që gjendeshin rastësisht në qendër.

Menjeherë është dashur ndërhyrja e policisë për të parandaluar veprimet e mëtejshme të agresorit të cilat mund të ishin të rënda.

Ende nuk dihet arsyet e një veprimi të tillë dhe të dhëna të tjera mbi agresorin i cili ka terrorizuar banorët.

Njoftimi

Këlcyrë

Reagimi i menjëhershëm dhe profesional i Policisë parandalon një ngjarje të mundshme kriminale.

Neutralizohet dhe prangoset 55-vjeçari, i cili me armë në dorë e fishek në fole gati për qitje ishte nisur drejt banesës së një shtetasi me të cilin ishte konfliktuar më parë për motive të dobëta.

Gjatë ndërhyrjes së Policisë, 55-vjeçari iu ka drejtuar armën punonjësve të Policisë, por falë ndërhyrjes profesionale është neutralizuar dhe prangosur.

Sekuestrohet arma e zjarrit kallashnikov dhe krehra me fishekë luftarak.

Në qytetin e Këlcyrës, shtetasi S. A., në gjendje të dehur, pas një konflikti për motive të dobëta me shtetasin A. S., ka shkuar në banesë ku ka marrë një armë zjarri dhe është drejtuar për në banesën e shtetasit A. S.

Shërbimet e Policisë, si rezultat i kontrollit të territorit dhe informacioneve të marra në rrugë operative se ky shtetas po qarkullonte me armë dhe mund të përfshihej në ngjarje kriminale, kanë ushtruar kontroll të imtësishëm të territorit dhe si rezultat, në afërsi të qendrës së qytetit Këlcyrë, kanë konstatuar shtetasin S. A., i cili lëvizte më një armë zjarri kallashnikov me vete.

Në momentin e ndërhyrjes së shërbimeve të Policisë, shtetasi S. A. iu ka drejtuar punonjësve të Policisë, armën të cilën e kishte me fishekë në fole gati për qitje. Falë profesionalizmit të shërbimeve të Policisë është bërë i mundur neutralizimi dhe arrestimi në flagrancë i tij.

Shërbimet e Policisë kanë sekuestruar në cilësinë e provës materiale armën e zjarrit automatik dhe 2 krehra me fishekë luftarak.

Materialet i kaluan Prokurorisë Pranë Gjykatës së Rrethit Gjyqësor Përmet, për veprime të mëtejshme.


Shtuar 7.05.2021 08:43