Në takimin e zhvilluar gjatë së premtes me ministren e Integrimit Majlinda Bregu, Komisioneri për Zgjerim në BE, Stefan Fyle ka ripërsëritur apelin ndaj politikës shqiptare për realizimin e reformave të kërkuara nga ky organizëm.

“Më lejoni të nënvizoj rëndësinë që ka kontributi i të gjithë aktorëve në realizimin e reformave, vazhdimi i bashkëpunimit gjithëpërfshirës dhe konstruktiv, si dhe dialogu ndërmjet qeverisë dhe opozitës. Komisioni është i gatshëm të japë mbështetje dhe orientime për këto përpjekje të rëndësishme të Shqipërisë, të cilat bëhen edhe më të rëndësishme në këtë kohë kur i gjithë rajoni po ecën përpara”, thekson Fyle.

Komisioneri Fyle mirëpriti miratimin nga Qeveria të Planit të Veprimit të rishikuar për plotësimin e rekomandimeve të shprehura nga Komisioni në Opinionin për Shqipërinë ndërsa ka kërkuar përmbylljen sa më të shpejtë të reformës zgjedhore dhe të rishikimit të Rregullores së Kuvendit, duke i hapur rrugën kështu progresit edhe në fusha të tjera. /albeu.com/