Familjen e zë furtuna në det: Djali e babai dërgohen në spital, gruaja nuk gjendet
Katër pjesëtarë të një familje janë kapur nga furtuna në det paraditen e sotme në Himarë.

Mësohet se tre prej tyre, ku përfshihen babai dhe djali kanë arritur të dalin nga deti, ndërsa po kërkohet gruaja e shtëpisë.

Familjarët kishin dalë për të mbledhur rrjetat në det.

Djali dhe babai i tij është transportuar në spitalin e Vlorës, ndërsa trupi i gruas nuk gjendet akoma.

Njoftimi i policisë

Himarë

Policia Kufitare dhe roja bregdetare shpëtojnë tre shtetas që rrezikuan të mbyteshin në det, të cilët kishin dalë për peshkim me një mjet të vogël lundrues, i cili u fundos.

Vijon kërkimi intensiv në det, për gjetjen edhe të një shtetaseje që ishte në bordin e këtij mjeti lundrues, e cila dyshohet se është mbytur.

Shërbimet e Policisë kufitare Dhërmi kanë marrë një telefonatë se një mjet lundrues ka dalë në det për peshkim dhe si pasojë e dallgëve të mëdha dhe motit të keq personat që ishin në bord rrezikonin të mbyteshin në Gjipe.

Shërbimet e Policisë Kufitare kanë dalë me mjetin lundrues menjëherë në drejtim të adresës së dhënë dhe kanë njoftuar edhe rojën bregdetare për ndihmë.

Si rezultat i operacionit të përbashkët të Policisë Kufitare dhe rojës bregdetare dhe ndihmës nga një mjet lundrues turistik i rastit, u bë e mundur të shpëtohen shtetasit R. R., F. R. dhe A. R., ndërsa shtetasja M. R. nuk është gjetur ende. Vijojnë kërkimet intensive me mjetet lundruese të Policisë Kufitare dhe të rojës bregdetare.

Personat e shpëtuar u dërguan në Jalë, ku i priste ambulanca e qendrës shëndetësore Himarë e njoftuar nga Policia Kufitare, dhe ndodhen në spital, jashtë rrezikut për jetën.
Shtuar më 05/08/2020, ora 10:59

Shkruani komentin tuaj!
Të fundit nga kjo kategori