Emirjon Senja: Si u "dogj" gjyqtari shumë i rëndësishëm për paratë e të vëllait emigrant
Reforma në Drejtësi vazhdon akoma që të ndryshojë çdo ditë mënyrën sesi funksionon sistemi i drejtësisë në vend.

Por si e ka pasqyruar media këtë "eksperiment" që po zhvillohet në vendin tonë?

Për këtë, mbrëmjen e djeshme në emisionin Kapital në Vizion Plus kanë qenë të ftuar kryeredaktori i Albeu, Emirjon Senja, gazetarja Edlira Gjoni dhe analisti Afrim Krasniqi.

Duke vlerësuar Reformën në tërësi dhe domosdoshmërinë e saj për vendin, Emirjon Senja ka shpjeguar një rast konkret ku sipas tij vettingu ka lënë vend për përmirërësim duke mos funksionuar siç duhet.

Në fillimet e tij, duke qenë se duheshin rezultate të shpejta, mjaft vendime të KPK janë dhënë duke u bazuar në vetëm një kriter. Kjo ka bërë që të qytetarët të mos marrin vesh për shembull nëse ky gjyqtar apo prokuror i skualifikuar ka qenë ose jo profesionist, apo ka patur apo jo lidhje me persona të inkriminuar.

"Ligji e parashikon që me një kriter skualifikohesh, por nuk është çështja vetëm që të heqim disa persona sepse kështu e kërkon procesi, por është krijimi i një standarti dhe besimit tek reforma."-është shprehur ai.

Kryeredaktori i Albeu ka përmendur rastin e Ish-Kryetarit të Gjykatës Kushtetuese, Bashkim Dedja.

Ky i fundit sipas Senjës, është larguar nga sistemi vetëm se i vëllai nuk kishte faturë për paratë e marra gjatë punës në emigracion në vitin 1995 me të cilat kishin blerë bashkë një shtëpi pak kohë më vonë.

"Z.Dedja për shembull është larguar vetëm se i vëllai nuk kishte një faturë të parave me të cilat kishin blerë një shtëpi bashkë 20 e ca vite më parë. Ai kishte punuar emigrant në Greqi dhe nuk kishte mundur të vërtetonte që paratë i kishte fituar me djersë nga puna e ndershme atje", tha gazetari duke theksuar se kemi 30 vite informalitet dhe nuk mundet që çdo gjë të vërtetohet me fatura. /albeu.com/
Shtuar më 14/12/2019, ora 14:22

Shkruani komentin tuaj!
Të fundit nga kjo kategori