Debati në Kuvend, deputetët xhelozë për sekretaret dhe makinat
Pëlqej
Komisioni i Ligjeve mori dje në shqyrtim buxhetin vjetor të institucioneve të drejtësisë. Në mbledhjen e komisionit u shqyrtua buxheti vjetor i Prokurorisë së Përgjithshme, Shkollës së Magjistraturës, Komisionit Qendror të Zgjedhjeve, Gjykatës Kushtetuese etj.

Gjatë zhvillimit të mbledhjes pati debate ndërmjet relatorit të projektligjit për buxhetin e vitit 2019, Bashkim Fino, dhe përfaqësuesve të institucioneve. Debati kryesor ishte mes përfaqësuesit të Prokurorisë së Përgjithshme, Luan Abazaj, dhe Bashkim Finos.

Prokuroria kishte kërkuar që për vitin 2019 të kishte një shtesë stafi prej 197 personash, ku nga ana e relatorit u cilësua si e papranueshme. Abazaj, në argumentimin e tij, u shpreh se nga kërkesa prej 197 personash, 30 janë oficerë të Policisë Gjyqësore, 30 koordinatorë për prokuroritë në rrethe, 5 specialistë juristë edhe 100 sekretarë për prokurorët. Ky përkufizim i fundit solli edhe reagimet në komision ku deputetët filluan të vetëkrahasohen, duke u shprehur se ata nuk kanë sekretarë. Xhelozia ndërmjet kërkesave të përfaqësuesve të institucioneve të pavarura dhe deputetëve vijoi më tej gjatë shqyrtimit të buxhetit vjetor të Shkollës së Magjistraturës.

Drejtori Sokol Sadushi u shpreh i kënaqur nga buxheti që i kishte alokuar Ministria e Financave për vitin 2019, por kërkoi një shtesë fondi për të blerë një fugon që do të vihej në funksion të transportimit të bazës materiale nëpër trajnime. Këtu, relatori Fino u shpreh se as deputetët vetë nuk kanë makina të paguara nga shteti, por lëvizin me makinat e tyre personale.

Debatet dhe batutat vijuan më tej me shqyrtimin e buxhetit vjetor të Komisionit Qendror të Zgjedhjeve. KQZ-së, për vitin 2019, krahas buxhetit për funksionimin e institucionit, iu alokuan edhe 600 milionë lekë shtesë për organizimin e zgjedhjeve për pushtetin lokal. Por KQZ, nga ana e saj, kërkoi shtesë fondesh për të shtuar një kat te godina aktuale për të zgjedhur ambientet e zyrave. Edhe në këtë çështje, relatori Fino debatoi duke u shprehur se zyrat e KQZ-së janë më të mira se të Parlamentit.

DISKUTIMI PËR BUXHETIN E PROKURORISË SË PËRGJITHSHME

Vasilika Hysi: Ne jemi 20 deputetë dhe kemi një sekretare dhe dy këshilltarë dhe bëjmë gjithë këtë punë të madhe.

Spartak Braho: Ti the që prokurorët s’duhet të kenë sekretarë. Në tërë botën, prokurori e ka. Ne nuk shtojmë as pastrues, as shoferë. Prokuroria ngarkohet me punë dhe do të ngarkohet më tepër. Kërkesa për 197 punonjës mund të jetë e fryrë, por 50 është e pamjaftueshme. Të shkojmë 100 punonjës

Luan Abazi: Prokurorët janë kthyer në sekretarë duke fotokopjuar

Bashkim Fino: Atë bëjmë edhe ne, fotokopjojmë, marrim letra, marrim shkresa

Luan Abazi: Mund të bëni ligj për veten

Bashkim Fino: Unë ligjin e kam bërë 100 herë kur bëj ligj për ty.

Vasilika Hysi: Edhe unë, që jam zëvendëskryetare e Kuvendit, bëj fotokopje vetë, e shtyp vetë, bëj fjalime vetë.

Ulsi Manja: Numri për 197 punonjës është i ekzagjeruar ose të paktën këtë vit buxheti i shtetit nuk ka mundësi për këtë shtim punonjësish

Bashkim Fino: Ne heqim nga vetja. Ka të tjerë që vijnë kërkojnë makina, ne nuk kemi asgjë. Çdo deputet meriton të këtë një këshilltar për të hartuar ligje.

Spartak Braho: Ne i kishim o Bashkim, po na i hoqi Saliu

Bashkim Fino: Ministria e Financave të shtojë 30 oficerë të Policisë Gjyqësore dhe 30 koordinatorë dhe të kemi parasysh vitin që vjen, që të shtojmë të tjerë. Bashkë me këto të shtojmë edhe 5 ekspertë juristë për dekriminalizimin.

DISKUTIMI PËR BUXHETIN E SHKOLLËS SË MAGJISTRATURËS

Ulsi Manja: Radhën e ka shkolla e Magjistraturës. Shpresojmë që të jetë gjetur zgjidhur puna e makinës.

Bashkim Fino- Ulsi Manjës: Ke makinë ti?

Ulsi Manja: Jo, nuk kam

Bashkim Fino: Po pse të ketë drejtori i Shkollë së Magjistraturës?

Sokol Sadushi (Drejtor i Shkollës së Magjistraturës): Kjo nuk është makinë e drejtorit. Ka katër vjet që shkolla kërkon një makinë për trajnime, për zhvendosjen e bazës materiale. Shkolla ka një automjet të vitit 2006 që ka dalë edhe jashtë përdorimit, harxhon edhe shumë karburant.

Bashkim Fino: Drejtori nuk duhet të vinte fare. Duhet të sillte një letër falënderimi dhe jo të na hante kohën kot. Njerëzit të lëvizin me makinat e tyre

Alket Hyseni: Komplimente juve që keni zgjedhur një gjirokastrit për relator. Komplimente edhe Kryeministrit që ka zgjedhur ministër të Financave një gjirokastrit po ashtu. Por gjirokastrit që gjirokastrit, bëje zemrën gur për një pesëmilionësh.

Bashkim Fino-Alket Hyseni: Me ça lëviz ti?

Alket Hyseni: Unë dhe ti kemi dieta, kemi edhe karburant.

Bashkim Fino: Po të masash kilometrat që bëj unë dhe ti, do dalim me këpucë të kuqe. Dieta kanë edhe këta.

Alket Hyseni: Të vëmë dorën në zemër dhe të japim një pesë milionësh. T’ia mbushim mendjen edhe Erion Braçes

Bashkim Fino: Nëse e shikoni që unë jam relator për shkak të origjinës sime, unë largohem

Sokol Sadushi: Është një fyerje për mua që përmendët çështjen e makinës. Unë heq dorë nga kërkesa për makinë.

Bashkim Fino: Ta thoshe që në fillim, pse na lodhe kot?

DISKUTIMI PËR BUXHETIN VJETOR TË KQZ-SË

Klement Zguri (Kryetar i KQZ-së): Shprehemi në parim dakord me buxhetin e alokuar nga Ministria e Financave. Kemi një kërkesë për shtesë kati për shtim zyrash, ndaj do na duhet një fond shtesë.

Bashkim Fino: Ju i keni komode zyrat. As në Parlament s’i kemi si tuajat.

Klement Zguri: Na i bëni më të shëmtuara, vetëm na shtoni hapësirën. Ne kemi dy mikrobusë të vitit 1994, që besoj nuk ia vlen të shpenzohen para për t’i vënë në punë. Kërkojmë dy mikrobus të rinj.

Ulsi Manja: Nxirrini nga inventari ato dy makinat se nuk ia vlen të vësh në punë makinat që kanë 24 vjet./panorma/
Shtuar më 09/11/2018, ora 10:15
Shkruani komentin tuaj!
Të fundit nga kjo kategori