Basha i këkon Venizelosit njohjen e pavarësisë së Kosovës
Në vijim të vizitës së tij në Tiranë, Zv. Kryeministri dhe Ministri i Punëve të Jashtme të Greqisë, Evangelos Venizellos u takua sot edhe me liderin e opozitës Lulzim Basha.

Gjatë takimit u vunë në dukje arritjet në marrëdhëniet dypalëshe mes vendeve tona gjatë viteve të fundit, rritjen e shkëmbimeve tregtare dhe ekonomike, mbështetjen që Greqia i ka dhënë integrimit euro-atlantik të Shqipërisë dhe bashkëpunimit strategjik për suksesin e projektit të Gazsjellësit Trans-Adriatik, TAP.

"Z. Basha vlerësoi shumë të rëndësishme marrëdhëniet me shtetin fqinj dhe theksoi angazhimin e Partisë Demokratike për të mbështetur dhe nxitur më tej këto marrëdhënie, duke theksuar, që për të arritur nivele edhe më të larta dhe për të shfrytëzuar plotësisht potencialin që ekziston në marrëdhëniet Shqiptaro-Greke, ne duhet të trajtojmë në frymën e bashkëpunimit dhe fqinjësisë së mirë të gjitha çështjet e mbartura dhe t’i zgjidhim duke demonstruar vullnet të përbashkët dhe vizion europian, si dy nga popujt më të vjetër të rajonit.Në këtë kuadër, z. Basha ngriti çështjen e anulimit të ligjit të luftës, si çështje e rëndësishme jo vetëm për shkak të perceptimit, por sidomos edhe të problemeve në lidhje me sekuestron konservative për pronat e qytetarëve shqiptare, veçanërisht atyre Çame" thuhet në njoftimin e shpërndarë për mediat nga selia blu.


Më tej Basha vlerësoi hapat e marra nga shteti Grek në ndërtimin e marrëdhënieve me shtetin e ri të Kosovës, ai theksoi rëndësinë e veçantë që ka për çdo qytetar shqiptar njohja e pavarësisë së Kosovës nga shteti Helen. Kreu i PD-së kërkoi angazhimin për zgjidhjen e problemit të toponimeve që ka vështirësuar lëvizjen në kufi të qytetarëve shqiptarë të lindur në Greqi. /albeu.com/

Shtuar më 14/10/2013, ora 17:14

Shkruani komentin tuaj!
Të fundit nga kjo kategori