Barroso: Ballkani, pjesë e BE-së
Presidenti i Komisionit Evropian, Jose Manuel Barroso, është shprehur se BE duhet të pranojë të gjitha vendet e Ballkanit.

Në një intervistë për gazetën e njohur gjermane "Bild", Barroso u shpreh se nuk duhet të harrohet se shumë nga këto vende vetëm para pak vitesh kanë zhvilluar luftë me njëra-tjetrën.

"Anëtarësimi në BE u ofron atyre më shumë perspektivë. Ai është një instrument i rëndësishëm për paqen në rajon. Sigurisht është më mirë të anëtarësojmë vendet e Ballkanit në BE, se sa t'i lejojmë të bien humnerën e errët të destabilizimit.

Në plan afatgjatë ne duhet t'i pranojmë të gjitha shtetet e Ballkanit kur ato të plotësojnë kushtet e kriteret e duhura",-ka thënë ai.

Deklarata ka tërhequr vëmendjen e të gjitha mediave gjermane. Kështu pjesë të deklaratës që lidhen me anëtarësimin e Ballkanit në BE kanë botuar disa media kryesore gjermane si "Frankfurter Allgemeine Zeitung", Handelsblatt", "Die Welt", e televizione të ndryshme.

Mediat gjermane përmendin hapat në rrugën drejt anëtarësimit të BE, ku Shqipëria përmendet si kandidatja e re në BE, ndërsa Kosova si një vend me perspektivë të hapur drejt unionit.

"Edhe për Turqinë dera e BE-së duhet të mbetet e hapur",-tha Barroso në intervistën për "Bild". Ky vend është një vend me rëndësi të madhe ekonomike, gjeopolitike, reformat e të cilit janë në interes të BE-së.

Megjithatë është e qartë, u shpreh Barroso, se Turqia duhet të përmbushë më parë të gjitha kriteret. Në fund të fundit të gjitha vendet e BE-së duhet të bien në ujdi për anëtarësimin e Turqisë. Kjo do të kërkojë disa kohë. BE hapi të mërkurën, pas tre vitesh më në fund një kapitull të ri negocimi me Turqinë./albeu.com/
Shtuar më 23/10/2013, ora 12:55

Shkruani komentin tuaj!
Të fundit nga kjo kategori