Krerët e Partisë Demokratike të Kosovës kanë zhvilluar të martën një takim ku është diskutuar për zgjedhjet e brendshme. Kryetari i PDK-së, Hashim Thaçi së bashku me sekretarin për organizimin e zgjedhjeve, Basri Musmurati, kanë mbajtur këtë takim me kryetarët e degëve të kësaj partie.

Nënkryetari Hajredin Kuçi ka thënë se ky ishte një takim i rregullt me kryetarë të degëve, njofton RTK.


“Ishte takim i rregullt i kryetarit të partisë dhe sekretarit për organizimin e degëve dhe të zgjedhjeve Basri Musmurati me kryetarë të degëve ku kanë marrë pjesë të gjithë kryetarët e degëve të partisë demokratike. Ata kanë marrë një angazhim shtesë për organizimin e zgjedhjeve në seksionin, në degë dhe nëndegë, kanë marrë edhe udhëzimet e domosdoshme që ato të mbahen sipas procedurave dhe sipas statutit në mënyrën më demokratike të mundur”, ka thënë ai. /albeu.com/