Përveç koncerteve të vazhdueshme në çdo skaj të Shqipërisë, por edhe jashtë saj, shumë artistë shfrytëzojnë verën si momentin më të përshtatshëm për të lançuar projektet e tyre të reja. Mjafton një kërkim i shpejtë në YouTube dhe do të vini re morinë e këngëve që janë publikuar, por jo të gjithë janë të impresionuar nga prurjet e këtij sezoni.
Por, për Ronela Hajatin, një nga këngëtaret më “cool” në vendin tonë, shumica e këngëve duken kopje të njëra-tjetrës.
“A e kam gabim nëse them që 90% e këngëve të kësaj vere janë njëlloj? Mu duk sot sikur një këngë ishte e gjatë nja 15 minuta kur në fakt ishin ndërruar nja 5 këngë”- u shpreh Ronela.
Ajo madje i ka shtuar dhe disa doza ironie duke thënë- “Mos kini frikë me ndërru dorë”.
Nuk e dimë nëse kjo deklaratë ishte thumb për ndokënd, apo thjesht një konstatim i këngëtares, por duhet ta pranojmë që vitet e fundit shumica e prodhimeve muzikore janë thuajse të ngjashme. Ashtu si çdo fushë tjetër, edhe arti ndodhet në udhëkryq dhe shpeshherë bastardohet në mënyrën më të shëmtuar të mundshme.
