Thaçi priti sot ministrin për çështje evropiane të Francës
Kryeministri i Republikës së Kosovës, Hashim Thaçi ka pritur sot në takim Ministrin për çështje evropiane të Francës, Thierry Repentin.

Në takim është biseduar për aktualitetin politik, për punën që po bën Qeveria e Republikës së Kosovës për përmbushjen e agjendës evropiane të integrimit dhe për raportet nërshtetërore mes Kosovës dhe Francës.

Kryeministri Thaçi në takimin e sotëm me ministrin francez, z.Repetin theksoi se në kuadër të procesit te integrimit në Bashkimin Evropian, dy prioritetet kryesore të Republikës së Kosovës për këtë periudhë janë negocimi i marrëveshjes së Stabilizim Asociimit dhe përmbushja e kritereve për liberalizimin e vizave.

Duke ritheksuar përkushtimin e Qeverisë së Republikës së Kosovës për përmbylljen me sukses të këtyre dy proceseve të rëndësishme në kuadër të agjendës evropiane të Kosovës, Kryeministri Thaçi shtoi se Kosova ka qenë, është dhe do të mbetet unike sa i përket të ardhmes evropiane, edhe sa i përket spektrit politik, vullnetit qytetar, por edhe të një uniteti të plotë gjithëqytetar, pa dallim etnie.

Kryeministri Thaçi në takim vlerësoi lartë marrëdhëniet ndërshtetërore mes Kosovës dhe Francës dhe shprehu vullnetin e Qeverisë që këto marrëdhënie të thellohen edhe më tej në fushat e interesit të përbashkët.

Ministri për çështje evropiane i Francës, Thierry Repentin, në takimin me kryeministrin Thaçi u shpreh për forcimin e marrëdhënieve ndërshtetërore mes dy vendeve. Z.Repentin potencoi mbështetjen e Qeverisë së Francës për perspektivën evropiane të Kosovës, duke theksuar domosdonë e vazhdimit të reformave dhe forcimit të bashkëpunimit rajonal.

Në takimin me Kryeministrin Thaçi, ministri për çështje evropiane i Francës, Thierry Repentin, po ashtu inkurajoi Qeverinë e Kosovës për vazhdimin e dialogut për normalizimin e marrëdhënieve ndërshtetërore mes Kosovës dhe Serbisë.

Në këtë kuadër, Kryeministri Thaçi e siguroi Ministrin Repentin se Kosova do të vazhdojë të mbetet e përkushtuar ndaj procesit të dialogut për normalizimin e marrëdhënieve me Serbinë dhe pret që në të ardhen të arrihen edhe marrëveshje tjera në interesin e përbashkët të dy shteteve sovrane. /albeu.com/
Shtuar më 03/09/2013, ora 18:01
Shkruani komentin tuaj!
Të fundit nga kjo kategori