Thaçi: Pres marrëveshje për krizën tregtare
Kryeministri Hashim Thaçi ka njoftuar kabinetin qeveritar se ditë më parë ka pranuar një telefonatë nga kryeministri i Maqedonisë dhe ka diskutuar për situatën e krijuar.

Më tej, Kryeministri Thaçi ka theksuar se kjo situatë e krijuar nuk është e shëndetshme as për shtetin e Kosovës as për shtetin e Maqedonisë. Nuk është fryma evropiane e relacioneve të mira mes dy vendeve. Prandaj, ne kemi shprehur shqetësimin tonë, dhe jemi dakorduar që kjo çështje të mbyllet sa më shpejt që është e mundur dhe të kthehet në gjendjen çfarë ka qenë.

“Jemi dakorduar që të zhvillojmë takimet në nivel sa më të lartë politik, dhe të përmbyllet mundësisht sot ose nesër. Kështu që, në emër të Qeverisë së Kosovës të vazhdojnë së diskutuari, zëvendëskryeministri Kuçi dhe zv.kryeministrja Kusari-Lila, por me vullnetin që të përmbyllen, sepse nuk është as pamje, as mesazh i mirë as për Kosovën, as për Maqedoninë, as për qytetarët tanë, as për Qeveritë tona” – tha Thaçi.

“Ju ftoj që të përmbyllet sa më shpejtë që është e mundur, natyrisht gjithmonë duke respektuar interesat e qytetarëve dhe të shtetit të Kosovës, por duke respektuar edhe standardet evropiane. Është mirë që vjen zv.kryeministri i Qeverisë së Maqedonisë, Xhaferi në Kosovë. Besoj se ka vullnet për tejkalimin e kësaj gjendje të padëshirueshme për shtetin e Kosovës, por aspak ndihmuese për qasjen anti-evropiane të shtetit të Maqedonisë për shtetin e Kosovës. Në asnjë rrethanë të mos lihet ndonjë hapësirë e manovrimit të keqinterpretimeve apo ta shfrytëzimit të situatës prej kujtdo qoftë” – theksoi kryeministri Thaçi.

Në mbledhjen e sotme të Qeverisë së Kosovës, Ministrja e Integrimeve Evropiane, Vlora Çitaku, ka njoftuar për procesin e negociatave për nënshkrimin e Marrëveshjes së Stabilizim Asociimit dhe për punë që është duke zhvilluar Komiteti Ndërministror për implementimin e Strategjisë së Integrimit të komunitetit RAE. /albeu.com/
Shtuar më 11/09/2013, ora 13:58
Shkruani komentin tuaj!
Të fundit nga kjo kategori