Thaçi për gazetën Austriake: Kosova do ta themelojë Gjykatën Speciale
Zëvendëskryeministri i parë, Hashim Thaçi, dhe ministri i Jashtëm i Kosovës ka thënë për gazetën austriake Der Standard se institucionet e Kosovës edhe pas vendimit janë të përkushtuara që të themelojnë Gjykatën Speciale.

"Ka pasur shumë akuza për situata të paqena dhe shpifje kundër luftës së drejtë të popullit të Kosovës për pavarësi. Ne jemi të vendosur për të pastruar emrin dhe trashëgiminë tonë. Gjykata Speciale është instrumenti ynë për t’i mbyllur një herë e përgjithmonë të gjitha spekulimet dhe akuzat që janë drejtuar ndaj shtetit të Kosovës dhe ndaj atyre që na mbështeten", ka thënë Thaçi për Der Standard duke shprehur bindjen se Gjykata Speciale do të themelohet nga institucionet e Kosovës.

Sipas Thaçit Qeveria dhe Parlamenti i Kosovës, po punojnë për të miratuar draft-ligjin e prezantuar, i cili do t'i hapë rrugë themelimit të Gjykatës Speciale.

Kurse, i pyetur për mosvotimin e deputetëve të PDK-së në herën e kaluar, Thaçi ka thënë se në PDK respektohet çdo opinion dhe vendim i deputetëve, por se do të vazhdojnë të flasin me deputetët për t'iu ofruar informacione dhe garanci shtesë në çështjet që ata po i kundërshtojnë.

Në lidhje me dialogun me Serbinë Thaçi është shprehur se Kosova është një shembull i bashkëpunimit në një rajon që ka vuajtur mjaft gjatë nga luftërat dhe konfliktet. "Në këtë raund të dialogut, ne presim që të nënshkruajmë marrëveshje për telekomin, energjinë dhe Asociacionin e Komunave", ka thënë Thaçi.

Për këtë të përditshme, ai është shprehur se interesi i Kosovës është përsëri i njëjtë me interesin e bashkësisë ndërkombëtare për të gjetur një zgjidhje, e cila do të akomodojë komunitetet, por edhe për të siguruar, ruajtur dhe fuqizuar paqen dhe stabilitetin.

Ndërsa në lidhje me rolin e Austrisë në fushën e telekomunikacionit gjatë bisedimeve me palën serbe, zëvendëskryeministri Thaçi ka thënë se pret që të finalizohet tash kjo marrëveshje dhe më në fund Kosova të marr kodin e vet telefonik.

“Austria ka luajtur një rol të rëndësishëm këtu, duke aplikuar në ITU për kod shtetëror, i cili do të përdoret nga Kosova. Austria ka luajtur një rol të rëndësishëm gjatë gjithë këtyre viteve”, ka thënë Thaçi, raporton Der Standard. /albeu.com/
Shtuar më 29/06/2015, ora 09:19
Shkruani komentin tuaj!
Të fundit nga kjo kategori