Enver Hoxhaj, Ministri i Punëve të Jashtme të Kosovës ka emëruar sot Konsull Nderi të Republikës së Kosovës në Lajpcig të Gjermanisë, Prof. Dr. Stefan Troebst.

Vendimi i Ministrit Hoxhaj, për emërimin e Troebst si Konsull Nderi, është mirëpritur dhe pranuar nga Ministria e Punëve të Jashtme e Gjermanisë.

Emërimi i Dr. Stefan Troebst në pozitën e Konsullit të Nderit të Republikës së Kosovës në Lajpcig, është një hap i rëndësishëm në kuadër të orientimeve strategjike të politikës së jashtme të Kosovës.

Dr. Stefan Troebst, është një personalitet i shquar i jetës publike dhe akademike në Lajpcig dhe në Gjermani si dhe një mik i madh i Kosovës. Troebst gjithashtu është një nga njohësit më të mirë të Evropës Juglindore. Ai ka shkruar shumë artikuj dhe studime për Kosovën dhe vendet e rajonit, të cilat konsiderohen ndër studimet më gjithëpërfshirëse. /albeu.com/