Skadojnë "afatet" e Thaçit, kufiri mbetet i bllokuar
Afatet” e përcaktuara nga kryeministri i Kosovës, Hashim Thaçi, për zgjidhjen brenda dy ditësh të ngërçit, duket se do të kalojnë pa përfillur fare.

Sot është dita e tretë qëkurse kryeministri kosovar kërkoi zgjidhjen e problemit me Maqedoninë, por gjendja ka mbetur tutje e pandryshuar.

Një gjë e tillë është konfirmuar përmes një njoftimi edhe nga vetë Qeveria e Kosovës.

“Pala maqedonase ende nuk e ka hequr taksën për qytetarët e Republikës së Kosovës që duan të shkojnë në Maqedoni. Taksa mbetet e njëjtë edhe për automjete transportuese dhe autobusë. Qytetarët e Republikës së Kosovës mund ta kalojnë kufirin vetëm në këmbë përderisa rruga e bllokuar në anën maqedonase nga disa mjete transportuese ende nuk është zhbllokuar nga autoritetet e Qeverisë së Maqedonisë”, thuhet në njoftimin e Qeverisë.

Qeveria e Kosovës dhe Ministria e Tregtisë dhe Industrisë janë shprehur se mbeten të përkushtuara, me vullnet të mirë, për zgjidhjen sa më të shpejt të situatës së krijuar, shkruan Zhurnal.

“Andaj dhe jemi në kontakt të vazhdueshëm me autoritetet maqedonase. Megjithatë, deri më tani përkundrejt angazhimit maksimal, ende nuk ka zgjidhje të situatës. E ritheksojmë faktin se heqja e menjëhershme e të gjitha pengesave të lëvizjes së lirë të njerëzve dhe barrierave tregtare nga Qeveria e Maqedonisë do të rezultojë me heqjen e menjëhershme të bllokadës së importit për produktet maqedonase nga Qeveria e Kosovës”, thuhet në njoftimin e Qeverisë së Prishtinës. /albeu.com/
Shtuar më 13/09/2013, ora 18:20
Shkruani komentin tuaj!
Të fundit nga kjo kategori