Edhe pse situata në veriun e Kosovës është më e qetë, serbët vazhdojnë të jenë në pikat kufitare duke bërë roje pranë barrikadave, duke “penguar” kështu ushtarët e KFOR-it të lëvizin lirshëm në këtë pjesë të Kosovës.

Nata ka qenë e qetë, ndërkohë që krerët nga strukturat paralele të komunave veriore kanë qëndruar deri në orët e vona të natës pranë barrikadave.

Burime të Kosovapress-it bëjnë të ditur se serbët e tubuar në Rudare, gjatë natës kanë vënë një kryq prej shtatë metrash, të cilin do ta pagëzojë episkopi Teodosije.

Sipas burimeve, deri sa është montuar një kryq i tillë nga ana e serbëve, mbi Rudare është parë vazhdimisht një helikopter i KFOR-it, i cili ka vëzhguar situatën nga lartë. /albeu.com/