Sot në Gjykatën e Hagës do të nisë sërish procesi gjyqësor kundër ish kryeministrit të Kosovës, Ramush Haradinaj. Në procesin gjyqësor që do zhvillohet sot dhe nesër, do të gjykohen edhe dy bashkëluftëtarët e Haradinajt, Idriz Balaj dhe Lah Brahimaj.

Në seancat përmbyllëse, Prokuroria dhe Mbrojtja do të thonë fjalën përfundimtare, për t`i lënë pastaj kohën për rreth dy muaj trupit gjykues që të marrë një vendim përfundimtar për këtë rast. Vendimi përfundimtar pritet të merret në fund të muajit gusht ose gjatë muajit shtator.

Haradinaj është kthyer në Tribunalin Ndërkombëtar për krime lufte në ish Jugosllavi, më shumë se një muaj pasi që Tribunali vendosi ta lirojë përkohësisht atë.

Haradinaj, Balaj dhe Brahimaj akuzohen për “vrasje, torturë dhe trajtim mizor, si krime që bien ndesh me ligjet dhe zakonet e luftës”.

Gjatë qëndrimit disa javor në Kosovë, Haradinaj shoqërohej nga Policia e Kosovës dhe forcat e EULEX-it, pasi gjykata e liroi atë nën masa të rrepta që nënkupton lëvizje të kufizuar dhe që të mos ketë asnjë përfshirje në veprimtari politike apo dalje publike.

Ramush Haradinaj është shpallur i pafajshëm në prill të vitit 2008, por Gjykata e Hagës vendosi për një rigjykim të pjesshëm, i cili filloi në korrik të vitit 2010. Haradinaj, Balaj dhe Brahimaj akuzohen për vrasje, torturë, si dhe për krime që bien ndesh me ligjet e luftës.