Rama: Shqipëria dhe Kosova të bashkuar në flamurin e BE
Qeveritë e Kosovës dhe të Shqipërisë po zhvillojnë mbledhjen e tyre të tretë të përbashkët. Ky takim i dy kabineteve po zhvillohet në Bibliotekën Kombëtare të Prishtinës, e cila këtë herë është përshtatur për të pritur kryeministrat Edi Rama dhe Isa Mustafa, si dhe anëtarët e tjerë të dy qeverive.

Në hapje të takimit, kryeministri i Kosovës, Mustafa, tha se ky bashkëpunim ndërqeveritar i vlen shumë të dyja vendeve, pasi çon përpara proceset integruese, rruga e përbashkët e Kosovës dhe e Shqipërisë.

“Thellimi i bashkëpunimit të dy qeverive tonë është në interes të dy vendeve tona, interes nacional dhe shtetëror, ndaj ne do të gjejmë kurdoherë gjuhën e përbashkët", tha Mustafa.

“Besoj se ky është një rast i përshtatshëm t’ju falenderoj për mbështetjen vëllazërore që na keni dhënë në sfidat e Kosovës, sidomos në njohjen e Kosovës dhe anëtarësimin e saj në organizata ndërkombëtare.

Dy qeveritë tona kanë përgjegjësi edhe për qytetarët jashtë vendeve tona. Dua të inkurajoj edhe më tutje komunitetet jo shumicë në Kosovë, për synimin e tyre për të ndërtuar një Kosovë multietnike e të barabartë për të gjithë.

Në Kosovë po kurorëzojmë marreveshje në shumë fusha, kemi marrë rekomandimin për liberalizimin e vizave, anëtarësimin në FIFA dhe EUFA. Ne jemi të vetëdijshëm se janë dhe fryt i mbështetjes tuaj dhe janë suksese të përbashkëta.

Ne jemi për dialog dhe fqinjësi të mirë me Serbinë dhe me Malin e Zi, me të cilin tani kemi problemin e demarkacionit. Ne nuk duam asnjë metër kufi prej këtij vendi, por vetëm do të shënojmë kufirin e mëparshëm.

Lidhur me terrorizmin, e keqja kërcënuese është një arsye më shumë që shtetet tona të bashkëpunojnë me njeri tjetrin”, përfundoi Mustafa.

Nga ana tjetër, kryeministri Edi Rama deklaroi se “në vitin 2014, në Prizren, nisëm një rrugëtim që ka krijuar një hapësirë të re dhe të jashtëzakonshme bashkëpunimi”.

Mbledhjen e sotme të qeverive Shqipëri-Kosovë, kryeministri Edi Rama e ka paralajmëruar “me një bilanc pozitiv dhe ambicie për të bërë ende më shumë”, ndërsa kryeministri Isa Mustafa “edhe një hap të përbashkët drejt të ardhmes evropiane”.

Edi Rama ka folur për bashkim kombëtar nën flamurin e Bashkimit Europian, por nuk ka lënë pa përmendur edhe bashkëpunimin me serbët, në kuadër të procesit të Berlinit. /albeu.com/


Shtuar më 03/06/2016, ora 11:44
Shkruani komentin tuaj!
Të fundit nga kjo kategori