Qeveria fillon bisedimet me serbët e Veriut
Qeveria e Kosovës në kuadër të planit për veriun, ka filluar kontaktet e para me banorët serbë në këtë pjesë të Kosovës në mënyrë që ata të pranojnë institucionet e Kosovës.

Burime të gazetës “Tribuna Shqiptare” brenda kabinetit të kryeministrit Hashim Thaçi, bëjnë të ditur se kohëve të fundit është rritur numri i qytetarëve në veri të cilët kanë shprehur vullnetin për të bashkëpunuar me institucionet e Kosovës.

Gjithashtu, sipas këtyre burimeve, Qeveria e Kosovës ka kërkuar nga serbët në veri, që të zgjedhin përfaqësuesit e tyre të cilët do të bisedonin me institucionet e Kosovës për integrimin e veriut por qeveria nuk do të pranojë të bisedojë me përfaqësuesë serbë të cilët kanë dosje në polici dhe dyshohen për veprime kriminale edhe nëse qytetarët serbë do të insistonin në përfaqësimin e tyre.

“Kontaktet dhe afrimi i qeverisë së Kosovës tashmë ekziston në veri. Pra ekziston një gatishmëri në të dyja anët për ta gjetur mënyrën e bashkëpunimit të normalizimit dhe integrimit të asaj pjese. Megjithatë, njëra ndër problemet e ardhshme do të jetë mënyra se si t`i tregojmë popullsisë në veri që përfaqësuesit legjitim nuk duhet të jenë kriminel dhe nuk do të mund që ata të përfaqësohen nga njerëz të cilët kanë dosje në polici”, i ka thënë ky burim gazetës.

“Dosjet e kriminelëve në veri duhet të publikohen nga instancat ndërkombëtare në të cilat përfshihen EULEX dhe KFOR, duke krijuar përshtypjen se institucionet e Kosovës dëshirojnë ta largojnë ata të cilët konsiderohen si kriminelë” ka shtuar më tej burimi. /albeu.com/
Shtuar më 14/05/2012, ora 09:18

Shkruani komentin tuaj!
Të fundit nga kjo kategori