Përurohet pika e kalimit kufitar Shishtavec-Krushevë
Pika e re e kalimit Shishtavec-Krushevë është përuruar ditën e sotme nga dy ministrat e brendshëm , Falmur Noka dhe Bajram Rexhepi. Duke qenë se është konkretizuar Marrëveshja e Bashkëpunimit Policor Ndërkufitar mes dy vendeve që parashikon edhe çeljen e disa pikave të tjera të kalimit, ka ardhur edhe përurimi i kësaj pike kufitare.

Sipas ministrit Noka, përurimi i saj është një moment i rëndësishëm në zhvillimin e mëtejshëm të marrëdhënieve mes dy vendeve.

“Sot, së bashku përurojmë me gëzim të pamasë këtë urë të re bashkimi dhe komunikimi, duke lënë pas të kaluarën, si një kujtim i hidhur që nuk do të mund të përsëritet më kurrë!
Qeveria shqiptare dhe Kryeministri Berisha e ka konsideruar gjithmonë bashkimin dhe bashkëpunimin me Kosovën si një detyrim madhor ndaj kombit shqiptar dhe shqiptarëve kudo jetojnë. Rruga e Kombit, kjo vepër madhore, realizuar me iniciativën personale të Kryeministrit Berisha dhe vazhdimi i saj në territorin e Kosovës, është shndërruar në rrugën e bashkimit, komunikimit dhe prosperitetit ekonomik për shqiptarët në të dy krahët e kufirit, pavarësisht luftës së egër që i bëri opozita socialiste. Sot distanca Prishtinë – Tiranë përshkohet në më pak se tri orë, duke rritur ndjeshëm bashkëpunimin, ekonomik, tregtar, kulturor dhe turistik.”- u shpreh Noka.

Ndërsa Ministri i Brendshëm i Republikës së Kosovës, Bajram Rexhepi theksoi se çelja e kësaj pike do të lehtësojë jetesën dhe bashkëpunimin e banorëve në këto zona rurale, të cilat gjatë dimrit kanë vështirësi komunikimi e lëvizjeje.

“Kjo do të lehtësojë që të ketë komunikim më të mirë, shkëmbim më të mirë, furnizim më të mirë në të dy anët dhe në të njëjtën kohë të parandalohen kalimet ilegale,” – tha Rexhepi.

Pjesëmarrëse në inagurimin ishin edhe Përfaqësues të lartë të policisë së Shqipërisë e Kosovës, autoritete nga pushteti lokal, banorë nga të dy krahët e kufirit. /albeu.com/
Shtuar më 10/05/2013, ora 14:55
Shkruani komentin tuaj!
Të fundit nga kjo kategori