Kryeministri Ramush Haradinaj ka pritur delegacionin e lartë nga Qeveria Gjermane, kryesuar nga sekretari i Shtetit në Ministrinë e Mbrojtjes, Thomas Richard Silberhorn dhe Maria Flachsbarth, sekretare e Shtetit në Ministrinë për Bashkëpunim Ekonomik.

Në një konferencë për media kreu i ekzekutivit, Ramush Haradinaj tha se ka ardhur momenti që prania e ushtarëve gjerman në Prizren zëvendësohet me park inovativ për zhvillim ekonomik.

Kurse, Sekretari i Shtetit në Ministrinë e Mbrojtjes, Thomas Richard Silberhorn tha se ky moment është i rëndësishëm pasi që ka ardhur koha që kampin ta transferojnë në duart e palës kosovare.

"Është një privilegj për neve që t'i tregojmë publikut në Kosovë se aktiviteti jonë ushtarak në Kosovë ka qenë i suksesshëm në atë mënyrë që kemi kontribuar. 20 vitet e fundit 27 ushtarë gjermanë kanë dhënë jetën në Kosovë, sikurse shumë familje kosovare ata janë sakrifikuar dhe sakrifica e tyre nuk ka shkuar dëm", u shpreh ai.

Maria Flachsbarth, sekretare e Shtetit në Ministrinë për Bashkëpunim Ekonomik tha se sot është një ditë historike.