Pavarësia e Kosovës, zbutet pesëshja e BE-së
Pëlqej
Pesë shtetet anëtare të Bashkimit Evropian të cilat ende nuk e kanë njohur pavarësinë e Kosovës, kanë filluar të ndryshojnë qëndrim ndaj shtetit të ri, duke shënuar progres në bashkëpunimet institucionale.

Ministri i Jashtëm, Enver Hoxhaj dhe deputetja e Lidhjes Demokratike të Kosovës (LDK), Vjosa Osmani, kanë thënë për “Epokën e re” se me përjashtim të Spanjës, e cila është me e ngurtë, Greqia, Sllovakia, Rumania dhe Qiproja kanë dhënë sinjale të qarta se nuk janë kundër pavarësisë së Kosovës.

Ata kanë treguar se disa prej këtyre vende kanë njohur pasaportat e Kosovës dhe kanë dhënë votat e tyre pro anëtarësimit të Kosovës në organizatat rajonale.

Hoxhaj ka thënë se me katër nga këto vende Kosova ka bashkëpunim të rregullt institucional, ndërsa ka bërë me dije se ka kontakte të drejtpërdrejta me homologët e këtyre vendeve.

“Tani kanë një qëndrim shumë më të zbutur ndaj Kosovës dhe padyshim se i gjithë progresi që ka bërë Kosova në kuptimin e konsolidimit të shtetësisë së brendshme dhe progresin që është bërë në drejtim të njohjeve ndërkombëtare, ka bërë që këto vende realisht të kenë qëndrim më të hapur karshi Kosovës”, është shprehur Hoxhaj.

Megjithatë, ai ka deklaruar se u takon vetë këtyre shteteve se kur do të vendosin ta njohin pavarësinë.

Edhe deputetja e LDK-së, Vjosa Osmani, ka thënë për “Epokën e re” se ka pasur një evoluim të qëndrimit të këtyre shteteve ndaj pavarësisë se Kosovës. Ajo ka treguar se në fillim ka pasur një qëndrim jashtëzakonisht negativ të këtyre shteteve ndaj pavarësisë, kurse më vonë kanë rrëshqitur kah një qëndrim neutral./albeu.com/
Shtuar më 09/10/2013, ora 16:41
Shkruani komentin tuaj!
Të fundit nga kjo kategori