Pacolli: Raporti i bazuar në shpifjet e del Pontes
Behxhet Pacolli
Krerët e AKR-së dhe përfaqësues të partnerëve të tyre të koalicionit kanë mbajtur tubimin e parë elektoral për rivotimin e së dielës në Skenderaj. Presidenti i AKR-së, Behgjet Pacolli, pasi ka prezantuar shkurt programin e këtij koalicioni, për të cilin ka thënë se përfshin zgjidhje për të gjitha problemet aktuale me të cilat përballet Kosova, ka folur edhe për koalicionet e mundshme për qeverinë e ardhshme.

Mirëpo, për të ardhur deri te kjo, ai ka thënë se duhet të plotësohen disa kushte që do të mundësonin zbatimin e programit ekonomik të AKR-së. “Ne nuk luftojmë për poste, por për Kosovën, dhe jemi të gatshëm të japim kontributin tonë si pjesë e qeverisë së vendit. Kushti kryesor është hapësira e mjaftueshme e veprimit, sepse ne duam të lëmë gjurmë të veprimit tonë”, ka deklaruar Pacolli, të cilin nuk e ka penguar aspak dekori i dasmave në sallën ku mbahej tubimi, e as fotografia e Thaçit, e vendosur prapa krahut të tij të majtë. Sipas tij, “kushti i dytë është bashkëpunimi me vetëm ata njerëz që i kanë duart e pastra dhe kanë vullnet për të zbatuar programin ekonomik të AKR-së”, ka thënë Pacolli, njofton Koha.

Në një fjalim të gjatë ai ka folur edhe për disponimin anti Kosovë të filluar nga Carla del Ponte e i vazhduar me raportin e Dick Martyt. Ai mandej ka thënë se e kishte hetuar këtë rrezik dhe mu për këtë kishte kërkuar reagim të organizuar kundër akuzave të Pontes, por nuk kishte hasur në përkrahje nga kryeministri i Kosovës, i cili e kishte nënçmuar rrezikun.

“Thaçi tha se ai është vetëm një libër, i cili nuk do të thotë gjë, e përkrahje nuk kam gjetur as te kreu i OVL-së për të reaguar kundër shpifjeve të Pontes për UÇK-në”, ka treguar Pacolli. Sipas vlerësimit të tij, raporti i Dick Martyt është bazuar krejtësisht në shpifjet e del Pontes dhe ka ftuar që ndaj raportit të veprohet në mënyrë të organizuar, ndërkohë që plan veprimi të faktorëve të unifikuar kosovarë ka kërkuar edhe për veriun e Kosovës, i cili, sipas tij, duhet të shpallet zonë e lirë ekonomike.
Shtuar më 07/01/2011, ora 20:25

Shkruani komentin tuaj!
Të fundit nga kjo kategori