Opozita: Muri duhet të rrënohet, këtë e obligon rezoluta
Ndërkohë Nol Nushi, anëtar i Këshillit të Përgjithshëm të Lëvizjes "Vetëvendosje", ka vlerësuar se muri, ashtu sikurse treni rus, është rezultat i dialogut me Serbinë.

"Afati për rrëzimin e murit është 31 janari i këtij viti. Muri është ilegal dhe është ndërtuar për qëllime të qarta të Serbisë. Si i tillë sigurisht që duhet të rrëzohet.

Por asnjëherë nuk duhet të harrojmë që muri, treni etj., janë vetëm disa nga pasojat më sipërfaqësore e direkte të dialogut të dëmshëm që po vazhdon me Serbinë", ka deklaruar ai për "Zeri.info".

Nushi më tej ka thënë se bisedimet me Serbinë vetëm sa e kanë normalizuar Serbinë brenda Republikës së Kosovës.

"Dialogu në fakt e solli normalizimin e Serbisë brenda Kosovës. Mosrrënimi i këtij muri ndihmon shumë në betonimin e një gjendjeje edhe ashtu të rëndë në atë pjesë të Kosovës", ka theksuar ai.

Kurse shefi i Grupit Parlamentar të AAK-së, Pal Lekaj, ka thënë se muri në veri duhet të rrënohet përfundimisht, pasi që, sipas tij, për një gjë të tillë ka votuar Kuvendi.

"Muri duhet të rrëzohet dhe kjo do të duhet të ndodhë jo pse Qeveria ka deklaruar, por sepse Kuvendi i Kosovës përmes një rezolute të votuar në mënyrë unike e ka obliguar që kjo të ndodhë brenda muajit janar".

Ndërkohë ka thënë se pasojat mund t'i marrë secili po qe se muri nuk arrihet të rrënohet në intervalin e parashikuar kohor.

"Pasojat mund t'i marrë parasysh secili nëse muri nuk rrënohet totalisht, duke e përfshirë edhe kryeministrin dhe Qeverinë e Kosovës, janë të vetëdijshëm për ato pasoja", është shprehur Lekaj.

Ndërkaq deputeti i "Nismës për Kosovën", Haxhi Shala, ka thënë se pret nga Qeveria që ta respektojë afatin kohor për rrënimin e murit në veri.

"Është një rezolutë e Parlamentit të Kosovës dhe besoj që Qeveria ta respektojë këtë rezolutë dhe në muajin janar të largohet ai mur në pjesën e veriut. Në qoftë se muri është vendosur jashtë ligjeve të shtetit, ai duhet të hiqet", ka deklaruar Shala.
Shtuar më 17/01/2017, ora 10:43
Shkruani komentin tuaj!
Të fundit nga kjo kategori