Nuk e kam hallin e Ramushit e as të Gazmendit
Arton Muhaxheri - Ashtu siç e dinë të gjithë, unë nuk jam me Ramushin, por as nuk dua ta mbroj, sepse nuk ka nevojë për mbrojtjen time, aq më tepër kur edhe politikisht qëndroj majtas. Përtej kësaj, akuzat që janë bërë kundrejt këtij njeriu dhe të cilat asnjëherë nuk janë vërtetuar, konsideroj se nuk janë të drejta.

Ne me të drejtë mund të kemi dyshime për mënyrën se si funksionon drejtësia në Kosovë, mirëpo pikërisht nga ata njerëz që akuzohet Ramush Haradinaj, ata edhe kanë pushtetin dhe e kanë drejtësinë në dorë. Ne rast se ka diçka nga akuzat e kryetarit të Pejës, Gazmend Muhaxheri, atëherë le ta iniciojë rastin dhe të sqarohet një herë e mirë situata edhe për ne të tjerët.

Pas zgjedhjeve parlamentare, Ramushi mblodhi njerëzit e tij dhe filloj publikisht spastrimin e partisë nga njerëzit që mund të kenë folur në emrin e tij dhe që po ashtu mund të kenë bërë vepra të caktuara. Ky veprim politik nga dikush u pa si guxim për të ndërmarr një hap të tillë, ndërsa personalisht e kam parë të panevojshëm sepse nëse ka elemente të tilla, partia pastrohet nga brenda dhe jo nga jashtë. Por, e kuptoj edhe arsyen përse e bëri publikisht, sepse kjo barre këtë njeri e ka munduar tash e 16 vite.

Me gjithë problemet që ka Peja, kryetari i saj, Gazmend Muhaxheri, gjen kohë me u marrë edhe me deklarata bombastike që apriori nuk u besoj pa u vërtetuar, dhe deri atëherë i trajtoj si shpifje.

Nuk e kam hallin as të Ramushit, as të Gazmendit, por e kam hallin e qytetit tim se si po degradon nga qeverisja e LDK-së, sepse Peja nuk mban në mend të ketë pasur ndonjëherë qeverisje me të dobët se kjo e kryetarit aktual që merret me deklarata koti.

Duke ju referuar edhe deklaratave të mëhershme të Muhaxherit kundrejt figurave të ndryshme politike dhe në veçanti kundër Haradinajt, mund ta kuptojmë se gjithmonë me deklarata të tilla del kur i humb vëmendja brenda subjektit të tij dhe përmes tyre dëshiron të trajtohet si hero i LDK-së. Këtë herë po e bën në një moment tjetër, kur pakënaqësia e qytetareve të Pejës ndaj qeverisjes së tij është në rritje, sepse kryetari Muhaxheri ka dështuar në mbajtjen e premtimeve elektorale dhe aq kohë sa i ka mbetur deri në fund, e ka të pamundur edhe teoritikisht t’i realizoj ato. Prandaj, u ofron qytetarëve ujin të cilin njëherë e kane pirë, pra shpifjet dhe propagandën ndaj të tjerëve

Haradinaj ishte po i njëjti edhe atëherë kur Muhaxheri ishte në Partinë Reformiste Ora. Madje dy herë për këtë subjekt ishte kandidat për kryetar dhe një herë shkoi në balotazh me kandidatin e AAK-së, Ali Berisha, i cili pati fituar zgjedhjet. Përse në atë kohë nuk e tha ai asnjë fjalë për këto që po i thotë sot? Sepse në ORA e kishte ndikimin dhe pushtetin, ndërsa në LDK është më vështirë të depërtosh pa e bërë veten të jesh në qendër të vëmendjes.

Po e përsëris: nuk e kam hallin as të Ramushit e as të Gazmendit, por kam hallin e qytetit tim. Drejtësia le të merret me rastet, ndërsa kryetari le të merret me qytetin për aq kohë sa i ka mbetur. /Albeu.com/
Shtuar më 05/11/2015, ora 17:15

Shkruani komentin tuaj!
Të fundit nga kjo kategori