Nëna e Draganit: Gjithmonë kam dyshuar se Serbia më vrau djalin
Zëvendëskryeministri i Serbisë, Aleksandar Vucic, është zyrtari i parë serb që ka pohuar publikisht se vrasjen e gjashtë të rinjve serb në lokalin “Panda” në Pejë, në vitin 1998, nuk e kanë krye shqiptarët, por është urdhëruar nga shteti serb me qëllim që të akuzohet UÇK.

Rrëfimi e një nëne, djali i së cilës është vrarë në masakrën e Pejës, është publikuar sot në portalin Vesti.

“Dyshimet se fëmijët tanë nuk janë vrarë nga shqiptarët kanë dalë pak pas vrasjes. E them këtë publikisht, si një nënë, dhe le të më gjykojnë. Shteti i ka vrarë dhe shpresoj se nuk do të marrë kohë kjo që më në fund të dimë se kush urdhëroi vrasjen. Shteti vret dhe askush në këto 15 vjet nuk reagon. Mendoj se kjo është një nga sekretet më të mëdha shtetërore. Është koha për ta zbuluar të vërtetën. Së paku shpirtrat tanë, shpirtrat e prindërve fëmijët e të cilëve u vranë do të ndjehen më lehtë”, shprehet Ljubica Trifovic, nëna e Draganit 17-vjeçar që u vra në masakër.

Kjo nënë shton se është falënderuese ndaj Vucicit, sepse u ka dhënë shpresë se vrasësit e vërtetë do të gjenden. /albeu.com/
Shtuar më 21/01/2014, ora 14:56
Shkruani komentin tuaj!
Të fundit nga kjo kategori