Borussia e Dortmund fitoi me rezultatin 2-1 ndeshjen e parë përballë PSG e vlefshme për 1/8 e Champions.
Heroi i mbrëmjes në ‘Signal Iduna Park’ ishte talenti Erling Haaland, me dy gola të shënuara kundër kampionëve të Francës.
Norvegjezi me paraqitjet, golat, grintën e treguar në fushë, ka fituar epitetin e sensacionit të këtij sezoni në futboll.
Këtë më së miri e dëshmojnë statistikat dhe rekordet që ka vendosur 19 vjeçari.
Haaland në 28 ndeshje këtë sezon ka shënuar 39 gola, dhe 11 prej tyre i ka shënuar në shtatë paraqitje te Dortmund, ku është transferuar në afatin kalimtar të janarit.
Ajo që është më e rëndësishmja, me dy golat e shënuara kundër PSG, Haaland bëhet lojtari më i shpejtë që arrin numrin e 10 golave në Ligën e Kampionëve për nga numri i paraqitjeve.
Ai gjithashtu, është golashënuesi më i mirë i kësaj gare këtë sezon.
