Prej disa ditësh mediat ruse dhe serbe po raportojne se, sisteme të fuqishme raketore ruse, BUK dhe S-400 Triumf, pritet të instalohen në Luginën e Preshevës, jo shumë kilometra larg bazës amerikane "Bondstill", në Ferizaj.

E pyetur nga Portali Albeu, zyra për shtyp e NATO-s, dhe veçanërisht Irina Novakova, është shprehur se, për momentin Aleanca nuk ka asnjë informacion të saktë rreth kësaj çështjeje dhe se është në pritje të informacioneve më të hollësishme.

"Ne jemi duke kërkuar informacion mbi çështjen që ju ngrini", ishte përgjigja e shkurtër nga zyra për shtyp e NATO-s.

Ngritja e bazës ruse në Preshevë po përcillet me shqetësim nga banorët e Luginës dhe nga i gjithë Ballkani, që e sheh këtë veprim si një kërcënim për paqen në rajon. /albeu.com/