Kryeministri i Kosovës, Isa Mustafa, i cili mopri pjesë në meshën e mbajtur për nder të shenjtërimit të Nënë Terezës, ka zhvilluar edhe një takim me sekretarin e Shtetit të Selisë së Shenjtë, Kardinalin Pietro Parolin.

"Duke shprehur mirënjohjen e Qeverisë dhe të popullit të Kosovës për përkrahjen e vazhdueshme të Selisë së Shenjtë, Mustafa kërkoi mbështetje të mëtejme për Kosovën.

Me këtë rast, kryeministri Isa Mustafa shprehu përkushtimin e shtetit të Kosovës për thellimin e gjithanshëm të bashkëpunimit me Selinë e Shenjtë.

Kreu i ekzekutivit kosovar, po ashtu, theksoi krenarinë e madhe të popullit të Kosovës për shenjtërimin e Nënës Terezë, duke e falënderuar për respektin e posaçëm që i është bërë delegacionit të Kosovës, gjatë këtyre ceremonive.

Sekretari i Shtetit i Selisë së Shenjtë, Kardinali Pietro Parolin, shprehu përkrahjen e Selisë së Shenjtë për Kosovën, duke i uruar Kosovës mbarësi në proceset e saj zhvillimore.

Kardinali Parolin, po ashtu, theksoi kënaqësinë e tij për pjesëmarrjen e shumë shqiptarëve dhe qytetarëve të Kosovës në ceremoninë e shenjtërimit të Nënës Terezë.

Gjatë qëndrimit në Romë, kryeministri Mustafa ka takuar edhe Nuncin Apostolik të Vatikanit për Slloveni dhe Kosovë, Juliusz Janusz.", thuhej në deklaratën informuese të Mustafës. /albeu.com/