Çështja e mandatit të presidentes Atifete Jahjaga dhe zërave për një koalicion të ri të PDK-së me AAK-në me zgjedhje të parakohshme duket se ka përçarë koalicionin qeverisës në Kosovë. Kryetari i Lidhjes Demokratike të Kosovës Isa Mustafa thotë se ai nuk i beson fjalëve të kryeministrit Thaçi dhe se LDK do ti qëndrojë deri në fund marrëveshjes politike.


"Kryeministri punën me të lehtë që bënë, është të japë deklarata. Mirëpo e ka edhe cilësinë që edhe të pendohet kur jep deklarata. I ndërron shpesh fjalët, ashtu siç i ka ndërruar për marrëveshje. I ka shkelur fjalët e veta dhe fjalët e shkruara. Kështu që unë fare nuk i besoj fjalëve të kryeministrit ", ka thënë ai.


Mustafa, sërish, ka theksuar se respekton marrëveshjen politike Thaçi, Mustafa, Pacolli, e cila çoi në zgjedhjen e presidentes së Kosovës, Atifete Jahjaga, por jo me mandat të plotë, siç e interpreton tani Gjykata Kushtetuese e Kosovës.


"Unë besoj në një marrëveshje politike, që e kemi bërë dhe insistoj që ajo marrëveshje të realizohet. Sepse natyrisht që kryeministri ka dëshirë që jo të vazhdojë deri në 2014, po të vazhdoj edhe më tutje, por do të jenë qytetarët ata që do të vendosin, se kush cilin mandat do ta marrë", ka shtuar Mustafa


Ditë më parë Kryeministri kosovar Hashim Thaçi iu dha fund aludimeve për një koalicion të ri, ndërsa tha se respekton vendimin e Gjykatës Kushtetuese për mandatin e presidents Atifete Jahjaga. /albeu.com/