Liberalizimi i vizave po ecën mirë sipas Ministres Çitaku
Vlora Çitaku, Ministrja e Integrimit Evropian, është shprehur dje se procesi i liberalizimit të vizave për shtetin e Kosovës nuk ka ngecje.

“Procesi i liberalizimit të vizave është duke ecur sipas dinamikës që e kemi paraparë. Mendoj se deklarata e znj. Lunaçek është nxjerr jashtë kontekstit. Po ashtu, mendoj se ka qenë befasuese, pasi kësi vlerësimi nuk ka dhënë Komisioni Evropian, i cili është kompetent për ta vlerësuar progresin e arritur”, është shprehur Çitaku.

Ajo ka thënë deklarata e Lunaçekut nuk e paraqet gjendjen reale të procesit të liberalizimit të vizave.

“Unë nuk dua të flas me data, por datat që janë përmendur nga deklarata e znj. Lunaçek nuk besoj se qëndrojnë pasi siç thashë më herët, jam e sigurt se janë nxjerrë nga konteksti dhe këtë do ta qartësoj edhe me znj. Lunaçek në takimin e radhës që do ta kem në ditët në vijim”, është shprehur Çitaku.

Ministrja Çitaku është shprehur edhe për ecurinë e procesit të negocimit të MSA-së, duke bërë me dije se takimi i tretë i kryenegociatorëve do të mbahet në pranverë.

“Presim që takimi i tretë i kryenegociatorëve të mbahet në pranverë të vitit 2014. Kjo do ta shënojë edhe përfundimin e procesit negociator dhe inicializimin e MSA-së. Pas përfundimit të procesit negociator dhe inicializimit të MSA-së, teksti i MSA-së do ta fillojë procesin zyrtar të miratimit në Parlamentin Evropian dhe Këshillin e Bashkimit Evropian”, ka theksuar Çitaku në një intervistë për "Epokën e Re".

Ministrija e Integrimit Vlora Çitaku ka thënë gjithashtu se nuk ka rrezik për prishjen e konsensusit sa i përket agjendës evropiane. /albeu.com/
Shtuar më 05/02/2014, ora 12:50

Shkruani komentin tuaj!
Të fundit nga kjo kategori