Lekaj: Nuk tërhiqemi nga rruga, manastiri të mos ketë kokën e Beogradit
Ministria e Infrastrukturës në bashkëpunim me komunën e Deçanit më 24 prill të këtij viti, kishin mbajtur ceremoninë e inaugurimit të fillimit të punimeve për ndërtimin e rrugës Deçan- Plavë.

Mirëpo, këto punime janë ndërprerë javën e kaluar për të rifilluar përsëri, pas reagimit të kishës ortodokse serbe në Kosovë dhe të misioneve ndërkombëtare në vend.

Një pjesë e kësaj rruge që ka filluar të ndërtohet një muaj më parë, kalon afër Manastirit mesjetar të Deçanit, që është edhe zonë e mbrojtur me ligj të veçantë, që është miratuar nga Parlamenti i Kosovës në vitin 2008.

Sava Janjiq, Igumen i ManastiritDeçanit është shprehur kundër fillimit të punimeve për ndërtimin e rrugës magjistrale që lidh Kosovën me Malin e Zi, nga Deçani deri në Plavë.

Mirëpo, Ministri i Infrastrukturës, Pal Lekaj, është shprehur se ndërtimi i rrugës që lidhë Deçanin me Malin e Zi, është duke u zhvilluar pa e "cenuar" zonën e mbrojtur.

Zona përreth manastiritDeçanit ka nxitur vazhdimisht mospajtime ndërmjet autoriteteve lokale dhe autoriteteve të manastirit, posaçërisht për çështjen e pronave, ndërkaq ministri Lekaj ka treguar, se punimet janë duke u vazhduar sipas planit.

Lekaj, ka thënë se qytetarët serbë dhe as objektet fetare në Kosovë nuk duhet të veprojnë me kokën e Beogradit, sepse kjo iu nxjerrë vetëm pengesa në integrimin e tyre në Kosovë.

“Punimet në rrugën Deçan- Plavë, janë duke vazhduar sipas planit dhe kontratës operatori ekonomik është duke rindërtuar rrugën Deçan - kufiri me Malin e Zi. Qytetarët serbë, e as objektet e subjektet fetare në Kosovë nuk duhet të veprojnë me kokën e Beogradit zyrtar, sepse kjo në jetën e përditshme të tyre iu nxjerrë vetëm pengesa në integrimin e tyre në Kosovë. Si institucione të Republikës së Kosovës, po bëjmë çdo gjë që është në dorën tonë, pa diskriminim që të jemi afër secilit komunitet”, është shprehur Lekaj për bota sot.

Por, ministri i Infrastrukturës Pal Lekaj, thotë se është takuar me homologun e tij malazez dhe kanë diskutuar këtë projekt.

Kurse, çështja e Manastirit e Deçanit është e brendshme dhe ashtu duhet të trajtohet.

“Ne e kemi diskutuar këtë projekt me homologun malazez edhe në takim me kryeministrin, vetëm si investim që Kosova po e bënë për të afruar qytetarët e dy vendeve tona. Por, kjo me Manastirin e Deçanit, është çështje e jona e brendshme dhe si e tillë është trajtuar. Mali i Zi përmes ministrit Nurkoviç shfaqi gatishmërinë që të investojë në atë pjesë ku lidhet pastaj me rrugën që po e rikonstruktojmë ne”, ka pohuar Lekaj.
Shtuar më 31/05/2018, ora 14:59
Shkruani komentin tuaj!
Të fundit nga kjo kategori