LDK e Prizrenit po pret verdiktin e gjykatës për Mujën
Lidhja Demokratike e Kosovës, dega Prizren, ka theksuar se po pret vendimin e gjykatës në lidhje me kryetarin e komunës së Prizrenit Ramadan Muja, por edhe përfundimin e mandatit qeverisës.

Ramadan Muja nuk ka mundur t'i ikë ndikimeve klanore të qarqeve të inkriminuara të PDK-së të cilët janë të njohura për të gjithë qytetarët e komunës së Prizrenit.

Katrahura në të cilën gjendet qyteti i Prizrenit, ndërtimet pa kriter, ndërtimet e egra në zonën historike të Prizrenit, problemet me parkingje, problemet në sistemin arsimor, në shëndetësi, e çdo gjë tjetër deri te mungesa e shërbimeve më elementare që ofron komuna, mos transparenca e zyrës së prokurimit duke keqpërdorëur në vazhdimësi paranë publike për nevoja të partisë në pushtet.

LDK-dega Prizren, vlerëson se shpresa e qytetarëve të Prizrenit mbetet verdikti i gjykatësve të EULEX-it të cilët pritet që të sjellin drejtësinë e vonuar për Ramadan Mujën dhe bashkpunëtorët e tij.

"Pas verdiktit të gjykatës, do të hapet një faqe e re shprese për qytetarët e komunës së Prizrenit. Me këtë edhe qeverisë së ashtuquajtur “Muja 3” mandati i saj do të përfundojë në muajin e tretë të këtij viti".

Gjyqtari Vladimir Mikula paralajmëroi se vazhdimi i dy seancave do të jetë sot me datën 27 shkurt si dhe me datën 13 mars.

Ai theksoi se aktgjykimi ndaj zyrtarëve komunalë të Prizrenit të cilët akuzohen nga EULEX-i për shpërdorim detyre pritet të shpallet me datën 14 Mars. /albeu.com/
Shtuar më 27/02/2014, ora 13:45

Shkruani komentin tuaj!
Të fundit nga kjo kategori