Kusari-Jabllanoviçit: Gjakova, Srebrenica e Kosovës!
Kryetarja e komunës së Gjakovës, Mimoza Kusari-Lila, ka treguar ministrit serb, Aleksandër Jabllanoviç, se Gjakova është Srebrenica e Kosovës.

"Të thuhet se nuk kam pasur njohuri për viktimat në Gjakovë gjatë luftës është edhe më ofenduese, përderisa masakra e Mejes, rrëmbimet në Çabrat, masakrat në familjet Vejsa, Dervishdana dhe shumë familje tjera i ngjasojnë mënyrave çnjerëzore që janë përdorur edhe në Srebrenicë. Me një fjalë Gjakova për njohurinë e ministrit është Srebrenica e Kosovës, andaj sikur të shërbente në Serbi, ky ministër do pinte ujë ky arsyetim, por përderisa shërben në Kosovë dhe merr të drejtë të ofendojë familjarët e viktimave dhe të pagjeturve atëherë nuk ka se si të arsyetohet!", ka thënë Kusari Lila, raporton Gazeta Tribuna.

Sipas saj, një politikan që ka vendosur të përfshihet në Qeveri për t’i shërbyer qytetarëve të Kosovës, që në ditët e para të ofendoj me gjuhë të urrejtjes qytetarët e komunës e cila është më e dëmtuara nga lufta e fundit, vërtet është e pakuptimtë.

"Sigurisht që pres nga kjo deklaratë të reflektojë edhe kryeministri Mustafa duke ndërmarr hapat e logjikshëm ku të paktën për mua do ishte e denjë që një kërkim falje ndaj qytetarëve të Komunës së Gjakovës dhe një tërheqje fjalësh në këtë rast nga vetë ministri do zbusnin ndjenjat e tensionuara të banorëve të Komunës së Gjakovës", vijon ajo.

Kryetarja e Gjakovës ka thënë se komuna të cilën ajo e udhëheq është njëra nga komunat në të cilën kanë bashkëjetuar dhe bashkëjetojnë në harmoni qytetarët e feve të ndryshme që bashkëveprojnë në paqe me njëri tjetrin duke respektuar në maksimum fenë e tjetrit.

"Me këtë kulturë gjakovarët janë rritur dhe është absurde të deklarohen akuza për mos-respektimin e feve të ndryshme, edhe të komunitetit pakicë, në këtë komunë. Ne si komunë, gjithmonë kemi qenë të hapur për të respektuar ushtrimin e fesë ortodokse nga komuniteti pakicë. Ne ju kemi ofruar siguri të vazhdueshme 4 motrave të cilat jetojnë në kishën ortodokse, ku edhe vetë i kam vizituar disa herë brenda vitit dhe jam njoftuar që ndjehen mjaft të sigurta në vendin ku jetojnë", ka thënë Kusari-Lila. /albeu.com/
Shtuar më 10/01/2015, ora 11:13
Shkruani komentin tuaj!
Të fundit nga kjo kategori