Kurti dyshonte se Konjufca ishte agjent i britanikëve
Deputeti i Kuvendit të Kosovës nga radhët e Lëvizjes Vetëvendosje, Dardan Molliqaj, ka thënë se kryetari i partisë, Albin Kurti, dyshonte se kolegu partiak, Glauk Konjufca, është agjent i britanikëve.

Molliqaj ka thënë, në “Rubikon” të KTV’së, përballë Konjfucës, se Kurti mendonte se Konjufca po punonte për ndarjen e VV’së.

“Albin Kurti ka dyshuar që Glauk Konjufca mund ta ndajë Vetëvendosjen, sepse Ambasada britanike po do”, ka deklaruar Molliqaj.

“Dhe ka ardhur, më ka thënë mua, dhe Glauku është mirë ta pranojë. Unë kam qenë kundër ta takojë Glaukun për këtë çështje”, ka treguar ai.

“Ka ardhur Albini te unë, ka thënë: ‘E kam një informata se Ambasada britanike po do ta çajë Vetëvendosjen përmes figurës së Glauk Konjufcës’”, ka thënë Molliqaj.

“Dhe, i kam thënë: Albin, mos u merr me këtë punë, dhe mos e tako”, ka shtuar ai.

“Ai ka shkuar dhe e ka takuar Glaukun, dhe ia ka thënë Glaukut. Ky e ka kaluar lehtë. Ky mund ta zgjedhë ta kalojë lehtë. Unë nuk e kaloj lehtë”, është shprehur Molliqaj.

Por, Konjufca ka mohuar pohimet e Molliqajt, duke thënë se e vërteta është ndryshe.

“Jo, s’më ka thënë kurrë Albin Kurti që kam diçka me britanikët”, ka thënë Konjufca.

“Më ka thënë krejt teknikisht, dhe ka qenë krejt pyetje korrekte”, është shprehur ai.

“Sa e mbaj mend muhabetin, ka qenë kryesisht në dimensionin, për shembull, me kë e keni vendosur që ti bash të shkosh në një aktivitet’”, ka theksuar Konjufca. /albeu.com/
Shtuar më 01/03/2018, ora 21:16

Shkruani komentin tuaj!
Të fundit nga kjo kategori