Krasniqi, EULEX-it: Imuniteti nuk hiqet me rezolutë
Kryetari i Kuvendit të Kosovës, Jakup Krasniqi, i është drejtuar me anë të një letre Misionit Evropian për sundimin e ligjit, EULEX, ku i është përgjigjur kërkesës së këtij Misioni, në lidhje me fillimin e procedurave për heqjen e imunitetit të disa deputetëve, ndaj të cilëve po zhvillohen hetime.

Përmes kësaj letre, Krasniqi i është drejtuar shefit të EULEX-it, Xavier Bout de Marnhac, duke i thënë se nuk është përgjegjësi e Kuvendit, që të merret me çështjen e imunitetit. Ai i ka sugjeruar EULEX-it që bazuar në Kushtetutën e Kosovës, Qeveria vetë, mund të kërkojë nga Gjykata Kushtetuese interpretim për imunitetin e deputetit, raporton REL.

Në këtë letër, Krasniqi ka theksuar se nuk ka nevojë të miratohet një rezolutë në Kuvend, kur qeveria me Kushtetutë, i ka të përcaktuara të drejtat e saj në këtë drejtim.

Kjo letër ka marrë mbështetjen e Kryesisë së Kuvendit, veç lëvizjes “Vetëvendosje”, e cila ka vlerësuar se nuk ka nevojë t`i njihet EULEX-it kjo e drejtë që e ka kërkuar. Ndërkohë, kryeministri, Hashim Thaçi nuk ka dashur ta komentojë kërkesën e EULEX-it lidhur me shqyrtimin e imunitetit të deputetëve të Kuvendit të Kosovës, të cilët janë nën hetime. Ai ka thënë se ende në zyrën e tij, nuk ka shkuar ndonjë dokument zyrtar për këtë çështje, prandaj nuk dëshiron të komentojë. /albeu.com/

Shtuar më 12/07/2011, ora 19:19
Shkruani komentin tuaj!
Të fundit nga kjo kategori