Hapen vendvotimet, në Veri thirrje për bojkot
UPDATE - Zëvendëskomandanti i Policisë së Kosovës në veri, Besim Hoti, tha për Radion Evropa e Lirë se gjendja e sigurisë në veri është kryesisht e qetë. Megjithatë, ai bëri të ditur se në tri lokacione në afërsi të qendrave të votimit, disa qytetarë janë duke bërë thirrje për të bojkotuar procesin e votimit.

"Së paku në tri lokacione të ndryshme të qendrave të votimit kemi grupe të qytetarëve, të cilët bëjnë thirrje për bojkotim të këtyre zgjedhjeve. Këta persona po qëndrojnë në një distancë më të largët nga qendrat e votimit dhe nuk kemi të bëjmë me bllokim të hyrjeve drejtpërdrejt me qendrat e votimit, por vetëm me shprehje të pakënaqësisë së tyre me këtë aspekt të votimit",-tha ai.

*********

09:13-Komisioni Qendror i Zgjedhjeve ka bërë të ditur se në gjithë territorin e Republikës së Kosovës, janë hapur qendrat e votimit.

Kryetarja e KQZ-së, Valdete Daka, tha se procesi i votimit është duke shkuar mirë, me përjashtim të një qendre votimi në veri të Mitrovicës.

“Është vetëm një vendvotim në Mitrovicën veriore, i cili për disa shkaqe teknike nuk është hapur ende; ndryshe të gjitha qendrat e votimit janë hapur”, deklaroi Daka në takimin e parë me gazetarët.

Sipas saj, deri tani nuk ka raportime për incidente apo
parregullsi. Sipas të dhënave zyrtare të prezantuara nga Komisioni Qendror i Zgjedhjeve, në garën për t’u zgjedhur kryetar në 38 komuna të Kosovës, janë 224 kandidatë, kurse për anëtarë të asamblesë komunale garojnë 7,704 kandidatë.

Lista përfundimtare e votuesve 2013 përmban 1, 779 357 emra të votuesve të ndarë në 38 komuna, me një rritje prej 191 103 apo 11.72 për qind në krahasim me zgjedhjet e kaluara.

Numri i qendrave të votimit është 798 (52 qendra të reja të votimit nga ato që kanë qenë në zgjedhjet e kaluara), ndërsa numri i vendvotimeve është 2, 366, me një rritje prej 86 vendvotimesh nga zgjedhjet e kaluara.

Gjithashtu lista e votuesve jashtë Kosovës 2013, përmban 8, 383 emra.

*********

OSBE, Gualtieri: Ditë e rëndësishme për vendin

09:00 - Shefi i misionit të BE-së në Kosovë për vëzhgimin e zgjedhjeve, Roberto Gualtieri ishte në qendrën e votimit te Xhamia e Llapit në Prishtinë, ku tha se këto zgjedhje janë të rëndësishme për Kosovën dhe demokracinë në vendin.

“Kjo është ditë shumë e rëndësishme për Kosovën për demokracinë. Unë këtu si vëzhgues do të jemi të paanshëm dhe neutral të martën do të jap deklaratën preliminare për procesin zgjedhor, mendojmë se prezenca jonë do t’i kontribuojë votuesve që të jenë të hapur dhe të drejtë”, ka thënë ai.

Ai tha se vëzhguesit e BE-së të cilët janë të vendosur në të gjitha komunat do të jenë shumë të kujdesshëm dhe të raportojnë për çdo gjë.

**********

Komisionerët shqiptarë bllokohen në lagjen e boshnjakëve

08:00 - Rreth 25 komisionerë shqiptarë të cilët kanë qenë të parashikuar të jenë nëpër qendrat e votimit në veri të Mitrovicës, nuk kanë arritur deri tani të shkojnë nëpër këto qendra.

Ata nuk kanë transport për një gjë të tillë dhe janë duke pritur në Lagjen e Boshnjakëve, ndërsa mësohet se nga stacioni i Policisë së Kosovës në veri, u është thënë se kanë mungesë të automjeteve. /albeu.com/
Shtuar më 03/11/2013, ora 11:20

Shkruani komentin tuaj!
Të fundit nga kjo kategori