"Kërcënon" ambasadorja e SHBA-ve: Nëse dështoni, Gjykatën Speciale e formon OKB-ja
Ambasadorja e SHBA-ve në Prishtinë, Tracy Ann Jacobson
Ambasadorja e SHBA-ve në Prishtinë, Tracy Ann Jacobson, i ka ribërë thirrje pushtetarëve të Kosovës që të themelojnë Gjykatën Speciale. Në të kundërtën, sipas saj, këtë gjë do ta bëjë Organizata e Kombeve të Bashkuara.

Gjatë aktivitetit të USAID-it "Angazhimi për Barazi", që ka filluar sot në Prishtinë, Jacobson u shpreh se Qeveria e Kosovës nuk duhet të rrezikojë legjitimitetin e vazhdueshëm dhe reputacionin, për shkak të një numri të vogël personash që mund të akuzohen.

Jacobson tha se janë duke pritur nga Qeveria që të pranojë draftin e fundit për Gjykatën Speciale që është prezantuar nga Brukseli.

"Unë shpresoj që së shpejti Qeveria të marrë një vendim srreth kësaj, që të dërgohet në Kuvend dhe ky i fundit të marrë vendimin e tij. Të gjithë e dimë se cila është alternativa e kësaj, nëse Qeveria dhe Kuvendi i Kosovës nuk e miratojnë këtë, atëherë Shtetet e Bashkuara dhe partnerët e tjerë strategjik të Kosovës nuk do ta bllokojnë më këtë në një proces në Kombet e Bashkuara. Prandaj iu bëj thirrje drejtuesve politikë në Qeveri dhe në Kuvend që të ecin përpara, që të marrin vendimin e që të mos rrezikojnë legjitimitetin e vazhdueshëm dhe reputacionin e Kosovës, për hir të një numri të vogël të njerëzve që mund të akuzohen", ka thënë ajo.

Jacobson tha se kanë pas shumë raunde të negociatave të zorshme, por në fund këshilltarët ligjorë, avokatët nga Bashkimi Evropian dhe Departamenti i Shtetit amerikan, kanë dalë me draftin e fundit, dhe siç tha ajo konsiderohet të jetë më i miri. /albeu.com/
Shtuar më 03/06/2015, ora 16:05

Shkruani komentin tuaj!
Të fundit nga kjo kategori