Instituti Demokratik i Kosovës në raportin e monitorimit të Kuvendit për muajin maj ka evidentuar shumë parregullsi dhe shkelje të rregullores së punës së Kuvendit.



Isuf Zejna nga Instituti Demokratik i Kosovës tha se procedimi i projektligjit nga Qeveria e Kosovës për plotësimin dhe ndryshimin e 21 ligjeve në fuqi në kuadër të legjislacionit për përfundimin e pavarësisë së mbikëqyrur, tregon një shkelje të procedurave të ligjbërjes.

“Ne konsiderojmë se kjo është në kundërshtim me procedurat dhe me harmonizimin e legjislacionit në Kosovë dhe si i tillë do të shkaktojë telashe në zbatimin e tij. Është e panevojshme që me një projektligj të veçantë të ndryshohen 21 ligje në fuqi, pasi ne konsiderojmë se secili ligj duhet të hyjë vetë në procedurën e plotësim ndryshimit”, tha Zejna.

Gjatë punës së Kuvendit është vërejtur se nuk ka përgjegjësi të deputetëve dhe shpërfillje të seancave plenare thotë Zejna, duke shtuar se mospjesëmarrja e tyre në seanca po mundëson kalimin e ligjeve kontestuese në Kuvend. /albeu.com/