Qendra për të Drejtën Humanitare në Beograd ka publikuar një dokument që thotë se shefi i ri forcave serbe ka përgjegjësi komande për krime lufte në Kosovë.

Qeveria serbe ka mohuar se gjeneral lejtënant Ljubisa Dikovic, i cili është emëruar në krye të Ushtrisë serbe në dhjetor, ka përgjegjësi për ndonjë mizori.

Por Natasa Kandic, drejtoreshë e Qendrës për të Drejtën Humanitare në Beograd, tha se një raport ushtarak nga viti 1999 tregon se një njësi e komanduar nga Dikovici - Brigada e 37-të - ishte prezente në një vend të quajtur Vragodol, në veriperëndim të Kosovës; ku dëshmitarët thonë se janë kryer krime lufte.

“Dëshmitarët tanë thonë se ushtria i rrethoi në pyll, ku ata vranë dy burra dhe një grua. Pastaj vranë më shumë njerëz në fushën e Vragodolit. Këto dëshmi dhe raporti ushtarak vërtetojnë njëri-tjetrin në çdo mënyrë të mundshme, përveç se raporti i ushtrisë nuk thotë se janë kryer krime”, tha Kandic.

“Gjenerali Dikovic dëshmoi gjithashtu para ICTY (Gjykata Ndërkombëtare për Krime Lufte në Ish-Jugosllavi) se kishte urdhër të dërgonte trupat e tij saktësisht në të njëjtën rrugë në të cilën krimet janë kryer, dhe në të njëjtën ditë”, i tha Kandic, BIRN-it.

Qendra për të Drejtën Humanitare lëshoi një raport të detajuar muajin e kaluar rreth Dikovicit dhe përgjegjësisë së tij si komandant gjatë luftës në Kosovë. Sipas parimit të përgjegjësisë komanduese, udhëheqësit mund të mbahen përgjegjës për krime të kryera nga forcat nën komandën e tyre, edhe nëse ata nuk i kanë urdhëruar mizoritë personalisht, ose kanë marrë pjesë në to.

Raporti i grupit për të drejtat e njeriut pohon se Dikovic ishte komandant i Brigadës së 37-të të Ushtrisë jugosllave e dominuar nga serbët, e cila sipas ICTY, bëri krime të rënda dhe në shkallë të gjerë kundër civilëve etnikë shqiptarë.

“Vrasjet ishin bërë gjatë bombardimit të NATO-s dhe Dikovic nuk i parandaloi krimet, edhe pse ishte i detyruar t’i ndalonte”, thotë raporti, raporton Gazeta JNK.

Dikovic u emërua shef i Ushtrisë së Republikës së Serbisë, më 12 dhjetor, me dekret të presidentit Boris Tadic.

Ministri i Mbrojtjes, Dragan Stuanovac, dhe prokurori për Krime Lufte i Serbisë kanë pohuar se akuzimet e grupit të të drejtave të njeriut nuk janë të vërteta, duke shtuar se Dikovici do të ishte dënuar nga ICTY, nëse do të kishte qenë përgjegjës për krimet e luftës.

Kandic tha se autoritetet serbe tani do të duhet t’i përgjigjen raportit të ri.

“Të paktën tani, ministri i Mbrojtjes dhe gjenerali do të duhen të shpjegojnë më tutje çfarë ndodhi atë ditë në Vragodol dhe kjo, shpresojmë, do të tregojë se kush po tregon të vërtetën,” tha Kandic.