Kadri Veseli takoi anëtarët e Asamblesë së NATO-s
Kryetari i Kuvendit të Republikës së Kosovës, Kadri Veseli, ka zhvilluar sot një takim me grupin e deputetëve të Parlamentit suedez, anëtarë të Asamblesë së NATO-s, i cili kryesohej nga Bjorn von Sydow, me të cilët diskutoi për prioritetet e Kuvendit të Republikës së Kosovës, me theks të veçantë, për çështje të sigurisë.

Veseli në takim me asamblistët suedezë, u ndal te zhvillimet në Kuvend dhe theksoi se institucionet e Republikës së Kosovës janë të përkushtuara për realizimin e agjendës euro-integruese, zhvillimin ekonomik si dhe sundimin e ligjit.

“Kosova është e vendosur për të thelluar paqen në rajon, të kontribuojë për mirëkuptim dhe besim të ndërsjellë, duke u bërë pjesë e mekanizmave të sigurisë siç është aderimi në NATO”, ka deklaruar Veseli.

Delegacioni suedez i shprehën përkrahje të plotë aderimit të Republikës së Kosovës në institucionet euro-atlantike, duke vënë në pah rëndësinë e fqinjësisë së mirë, mirëkuptimit dhe bashkëpunimit rajonal./Albeu.com/
Shtuar më 31/05/2016, ora 13:13

Shkruani komentin tuaj!
Të fundit nga kjo kategori