Jeremiç: Prishtina jo e gatshme për bisedime
Pëlqej
Vuk Jeremiç
Shefi i diplomacisë serbe, Vuk Jeremic ka vlerësuar se Prishtina, në këtë moment, nuk është e gatshme për të nisur dialogun me Beogradin.

Në një intervistë për të përditshmes serbe “Blic”, ai ka thënë se Serbia ka hartuar strategjinë për dialog me Prishtinën, e cila sipas tij nuk është e gatshme për fillim të bisedimeve.

“Kështu duket sipas informatave që marrin nga partnerët në bashkësinë ndërkombëtare. Edhe pse mendojmë se çdo gjë do të ishte më mirë sikur bisedimet të fillonin sa më parë, ne do të jemi të durueshëm”.

Sa i përket Serbisë, ministri Jeremic ka thënë se ajo ka hartuar strategjinë për bisedime mbi të gjitha çështjet në përputhje me politikën shtetërore të Serbisë. Ato do t’i udhëheqin ekspertë për fusha përkatëse dhe jo funksionarë të lartë.

“Dialogu, sipas nesh, duhet të nis nga tema, të cilat janë më së paku të ngarkuara me mospajtime politike, siç është fati i personave të zhdukur, komunikacioni ose komunikimet...”.

Sipas tij, një numër i madh problemesh, që kanë Beogradi edhe Prishtina nuk mund të zgjidhen, ngase ka shikime plotësisht të kundërta për statusin e Kosovës. “Ato nuk do të jetë e mundur të zgjidhen pa biseduar për to. Por, këtë fakt nuk duhet keqpërdorur për qëllime të brendshme politike. Ne sinqerisht dëshirojmë kompromis dhe jo ngrirje më të thellë të konfliktit”, ka thënë Jeremic.
Shtuar më 29/11/2010, ora 14:04
Shkruani komentin tuaj!
Të fundit nga kjo kategori