Jakup Krasniqi: Me këtë KQZ rrezikohen zgjedhjet e lira
Ish kryetari i Kuvendit të Kosovës, Jakup Krasniqi ka komentuar emërimet e anëtarëve të rinj të KQZ-së. Sipas tij, me emërimet e fundit është shkelur rend neni 139 paragrafi katër i Kushtetutës për ndërtimin e një institucionit të pavarur i cili e ka përgjegjësinë për të mbikëqyrur mirëvajtjen e Zgjedhjeve të lira e demokratike

Kryetari i Këshillit Kombëtar të Nisma’s Socialdemokrate ndër të tjera ka thënë se ata që e kapen KQZ-në, vështirë është për t’ju besuar se nëse vijnë në pushtet, nuk do t’i kapin edhe institucionet tjera dhe do të bëhen pronar të kapjeve të tjera. Përndryshe, pse të bëheshin kapës të KQZ-së se bashku me atë që e kanë akuzuar bash për çdo gjë?

Statusi i plotë i Krasniqit:

Me ketë konstituim të KQZ-së, në rend të parë, është shkelur rend neni 139 paragrafi katër i Kushtetutës për ndërtimin e një institucionit të pavarur i cili e ka përgjegjësinë për të mbikëqyrur mirëvajtjen e Zgjedhjeve të lira e demokratike. Ndërsa kështu siç është konstituua, nuk mund të konsiderohet si institucion për mirëvajtje, por institucion për tallavajtje.

Kushtetuta e thotë qartë, KQZ-ja përbehet nga përfaqësuesit e Grupeve parlamentare të Kuvendit. Pasi vetëm kjo përbërje që e ka nënvizuar Kushtetuta, garanton zgjedhje të lira, të drejta e demokratike, gjë që nuk e garanton përbërja si po tentohet të konstituohet KQZ-ja.

Veç kësaj, kjo mënyrë e konstituimit është kapje e KQZ-së nga partizanet e zëshëm të kapjes e të shkapjes së institucioneve të shtetit. Për partizanet e shkapjës që brenda natës u bënë kapës të një institucioni të pavarur, kush mund të na garantoj që nesër nuk do të dakordohen këta partizanë të vegjël për kapjet e tjera, si p.sh edhe të krimit e të korrupsionit?!

Praktika jetësore na tregon: Kushdo që ka vjedhur a ka grabitur pak, sa herë ju ka dhënë mundësia, kanë vjedhur e grabitur edhe shumë. Ata që e kapen KQZ-në, vështirë është për t’ju besuar se nëse vijnë në pushtet, nuk do t’i kapin edhe institucionet tjera dhe do të bëhen pronar të kapjeve të tjera. Përndryshe, pse të bëheshin kapës të KQZ-së se bashku me atë që e kanë akuzuar bash për çdo gjë?

Të përfundoj: Kërkoj nga të gjithë ata që e udhëzuan, që e kërkuan dhe e realizuan ketë kapje të KQZ-së, e cila kapje do t’i dëmtoj rënd zgjedhjet e lira e demokratike dhe vet demokracinë, mos të na dërdëllisin më, për mungesë demokracie a mungesë vullneti për të luftuar krimin e korrupsion si dhe mos sundim të ligjit në Kosovë?! Ata duhet që ta dinë se këtyre shëmtive të përmendura dhe shumë të tjera të pa përmendura ua trasuan të gjitha rrugët ekzistuese, duke hapur edhe të reja!

Me ketë logjikë veprimi, degradimi i demokracisë, por edhe i shtet-ndërtimit do të vazhdoj e thellohet!

Qofsha i gabuar!
Shtuar më 29/03/2019, ora 10:58
Shkruani komentin tuaj!
Të fundit nga kjo kategori