Krasniqi: Shkova në EULEX për t’u sqaruar dhe ndihmuar drejtësinë
UPDATE - Kryetari i Kuvendit të Kosovës, Jakup Krasniqi është marrë në pyetje nga prokurorë të EULEX-i, në cilësinë e të dyshimtit për krime lufte. Ai ka shkuar me veturë zyrtare në selinë e këtij misioni në dalje të Prishtinës. Pasi ka përfunduar intervistimi, avokati i Krasniqit, Mexhid Syla ka konfirmuar se kryeparlamentari është intervistuar në cilësinë e të dyshimtit. Ai ka theksuar se intervistimi i tij lidhet me deklarimet e një dëshmitari të mbrojtur se kinse Krasniqi kishte qenë i përfshirë në një rast torturimi në Likoc të Drenicës, raporton KTV-ja.

Avokati Syla ka thënë se këto pretendime janë të pabaza. Krasniqi është akuzuar pikërisht nga dëshmitarët, në bazë të deklaratave të të cilëve është ngritur aktakuza e dytë ndaj ish-komandantit të UÇK-së, Sylejman Selimi dhe tre të tjerëve, për tortura fizike dhe psikike ndaj dy personave, të cilët ishin mbajtur në qendrën e ndalimit në Likoc. “Një nga ushtarët që është prezantuar si ‘Jakup Krasniqi’ ia kishte prerë buzën Dëshmitares A me thikë”, thuhet në aktakuzën e EULEX-it, duke shtuar se motrat dëshmitare të mbrojtura, thonë se “Jakup Krasniqi” ua kishte prerë të dyja vajzave flokët me thikë.

Jakup Krasniqi, gjatë luftës në Kosovë, ka qenë ish-zëdhënës dhe anëtar i Shtabit të Përgjithshëm të UÇK-së.
Pas marrjes në pyetje nga EULEX-i, në cilësinë e të dyshuarit për krime lufte, Krasniqi ka reaguar në Facebook, duke shkruar se akuzat që ia ka bërë EULEX-i i ka vlerësuar si propaganduese dhe pa asnjë bazë të vërtetë e që synojnë të relativizojnë krimet serbe në Kosovë, sidomos kur ato çdo ditë e më tepër po dalin në shesh nga protagonistët që kanë kryer vrasje më mizore kundër shqiptarëve në Kosovë.
“Përmes deklaratës së 15 nëntorit 2013, e njoftova opinionin publik për motivet e vërteta të propagandës për gjoja implikimin tim në ‘prerje flokësh’ dhe ‘prerje buzësh’ të të burgosurve nga UÇK-ja! Jemi duke jetuar në një kontekst të veçantë historik ku shpifjet kundër personaliteteve të ndryshme, madje edhe kundër një lufte çlirimtare bëhen përmes mediave dhe askush nuk merret në përgjegjësi të sqarojë shpifjet e tilla”, ka shkruar Krasniqi. Sipas tij, demantet përmes deklaratave publike nuk mjaftojnë dhe duhet të shkohet edhe në zyrat e hetuesisë për t’u sqaruar. “Ketë e bëra unë sot me gatishmërinë për të ndihmuar drejtësinë dhe të vërtetën për luftën në Kosovë 1998/99. Sa herë të kërkohet dhe nga kushdo që kërkohet, unë jam i gatshëm të sqaroj dhe të mbroj pastërtinë e luftës sonë çlirimtare”, ka shkruar Krasniqi.

Hetimet e EULEX për krime lufte në Kosovë janë zgjeruar gjatë viteve 1998-1999.

Kryeparlamentari Jakup Krasniqi, i cili ka qenë njëri nga anëtarët e Shtabit të Përgjithshëm të UÇK-së, gjatë ditës do të mund të merret në pyetje si i dyshuar për krime lufte ndaj popullatës civile, gjatë periudhës 1998-1999, sipas lajmi.net

Siç pohohet, në varësi të rezultateve të hetimeve, Jakup Krasniqi mund të përfshihet në aktakuzën që tashmë është ngritur për Sylejman Selimin, Ismet Haxhën, Nexhat Çubrelin dhe Shefki Hysenin. /albeu.com/
Shtuar më 20/12/2013, ora 23:33

Shkruani komentin tuaj!
Të fundit nga kjo kategori